एका आरोपीला चौकशीदरम्यान थर्ड डिग्रीचा वापर करत अमानुष छळ करण्यात आल्याची भीतीदायक घटना उत्तर प्रदेशातील बिठूर पोलीस ठाण्यात घडली आहे. आरोपीला बेदम मारहाम केल्यानंतर पोलिसांनी त्याच्या गुप्तांगात पेट्रोल टाकले. त्यानंतर इलेक्ट्रिक करंट लावत असताना पेट्रोलने अचानक पेट घेतल्याने आरोपी भाजला. तो विव्हळू लागल्याने पोलिसांनी त्याला तातडीने हॉस्पिटलमध्ये दाखल केले. दरम्यान, काही तासांतच वरिष्ठ पोलीस अधीक्षक अनंत देव यांनी संबंधित पोलीस निरीक्षकास निलंबित केले.
पोलिसांवर गंभीर आरोप
काही दिवसांपूर्वी बिठूर भागात भिडैया गावचा रहिवासी निर्मल याची हत्या करून त्याचे शव रेल्वे ट्रॅकवर फेकून देण्यात आले होते. या प्रकरणी तपासानंतर पोलिसांनी उन्नाव येथून दोघांना चौकशीसाठी ताब्यात घेतले. गुन्हा कबूल करावा यासाठी पोलिसांनी या दोघांना बेदम मारहाण केली असा आरोप आहे. त्यानंतर त्यांना निर्वस्त्र करत त्यांच्या गुप्तांगांमध्ये पेट्रोल टाकून इलेक्ट्रिक करंट देण्यात आला. असे करत असतानाच अचानक पेट्रोल पेटले. पोलिसांनी आग विझवून वेदनेने विव्हळणाऱ्या मोनू याला हॉस्पिटलमध्ये दाखल केले.
कुटुंबीयांचा आक्रोश
मोनूच्या कुटुंबीयांना हा प्रकार समजल्यानंतर त्यांनी पोलीस ठाण्याकडे धाव घेतली. तिथे त्यांनी घडलेल्या प्रकारावर आक्षेप घेणे सुरू केले. पोलीस ठाण्यात गोंधळाचे वातावरण निर्माण झाले. परिस्थितीची माहिती मिळताच कल्याणपूरचे परिमंडळ अधिकारी पोलीस ठाण्यात दाखल झाले. मात्र, मानूने त्याच्याकडे असलेल्या काडीपेटीद्वारे स्वत: आग लावली असे ठाण्यातील पोलिसांनी सांगितले. मात्र, ही आग पोलिसांनीच पेट्रोल ओतून लावली असे मोनूने हॉस्पिटलमध्ये जबाब देताना सांगितले. आपण प्रसारमाध्यमांकडे काही बोललो तर माझा एन्काउंटर केला जाईल, अशी भीतीही मोनूने व्यक्त केली.
पोलिसांनी दुसऱ्या आरोपीला सोडले
प्रकरण भडकण्याची शक्यता लक्षात घेत पोलिसांनी दुसरा आरोपी सोनूला सोडून दिले. हे प्रकरण पोलिसांनी लपवण्याचा प्रयत्न केला. मात्र मोनूच्या कुटुंबीयांना मंगळवारी दुपारी हा घडलेला प्रकार समजला.