मी कॉलेजवरून रोज येताना काकांजवळ दोन मिनिटे थांबायचो, गप्पा मारून पुढे निघायचो. आजही संध्याकाळी मी काकांशी दोन मिनिटं बोललो आणि पुढे पायऱ्यांवर आलो तर मागे धाडकन आवाज आला…काकांचा फक्त आकाशाकडे झेपावणारा हात मला दिसला… २१ वर्षाचा निलेश एगडे सांगत होता. पूल दुर्घटनेमध्ये निलेशचे काका जबर जखमी झाले आहेत. काही मिनिटे तिथेच थांबलो असतो तर काय झालं असतं या कल्पनेनेही त्याच्या अंगावर शहारे येतात.
‘कसलातरी जोरदार आवाज कानावर पडला, काय झाले ते कळले नाही. मागे वळून पाहिले तर काका ज्या ठिकाणी बसत होते, तो सगळा भागच खाली कोसळत होता…’हे सांगताना त्याचा आवाज कापतो. त्याचे काका आत्माराम ऐडगे हे नवी मुंबई येथे राहतात. दुपारी चार ते आठ या वेळेमध्ये ते पुलावर केळी विकण्याचे काम करतात. मागील नऊ वर्षांपासून ते या पुलावर केळी विकण्याचा व्यवसाय करतात. निलेश आणि त्याचे कुटुंब हे चंदनवाडी येथे राहते. केळी विकून उदरनिर्वाह करणाऱ्या काकांचे कुटुंबावर खूप प्रेम आहे. त्या काळजीने गावातले सगळे नातेवाईक संध्याकाळपासून फोन करून त्यांची विचारणा करत आहेत.
जीटी रुग्णालयामध्ये दाखल केलेल्या आत्माराम यांच्या पाठीच्या कण्याला जबर मार लागला आहे. हातापायालाही जखमा झाल्या आहे. शरीरामध्ये वेगवेगळ्या ठिकाणी फ्रॅक्चर झाले आहे. तेरणा कॉलेजला असलेल्या निलेशने पूल कोसळल्याचा आवाज ऐकताच मागे वळून पाहिले. ‘काका’ अशी हाक मारली तेव्हा पुलाचा भाग खाली येताना दिसला. नेमके काय करावे लक्षात न आल्याने त्याने पुलाच्या चार ते पाच पायऱ्या शिल्लक असताना खाली उडी मारून पडलेल्या ढिगाऱ्याकडे धाव घेतली. काकांच्या शर्टाच्या रंगावरून ते आतमध्ये अडकल्याचे ओळखले. पोलिसांनी त्यांना बाहेर काढल्यानंतर तातडीने रुग्णालयामध्ये नेण्यात आले.