शाळा, कॉलेजच्या माजी विद्यार्थी मेळाव्यात मित्र- मैत्रिणीचे कोंडाळे जमते. तो संजय कुठे असतो रे… इथपासून शाळेनंतर ‘ती’ पुन्हा दिसलीच नाही, अशा गप्पा रंगतात. त्यानंतर एकमेकांच्या मोबाइल नंबर्सची देवाणघेवाण होते. पुढे प्रत्येक सणावारी, वाढदिवशी मित्र- मैत्रिणींचा चमू प्रत्यक्षरित्या न भेटताही ‘व्हॉटसअॅप ग्रुप’च्या व्यासपीठावर एकत्र जमतो आणि सुरू होतो मैत्रीचा कल्ला…
धकाधकीच्या जीवनात सोशल नेटवर्किंग साइट्स आणि ‘व्हॉट्सअॅप ग्रुप’च्या माध्यमातून शाळा, कॉलेजातील जुने मित्र- मैत्रिणी एकत्र येत आहेत. आमच्यावेळी असे नव्हते, असे वक्तव्य करणारी वडीलधारी मंडळीही कॉलेजियन्सच्या खांद्याला खांदा भिडवत व्हॉटसअॅप ग्रुपवर सक्रिय झाली आहेत. काही वर्षांपूर्वी शाळा- कॉलेजमध्ये एकत्र असणारी मित्रमंडळी ‘व्हॉटसअॅप’च्या कट्ट्यावर गप्पांचे फड रंगवू लागली आहेत.
उत्तीर्ण झालेले वर्ष आणि शाळा- कॉलेजच्या नावांनी ग्रुप तयार होतात. लंडन, पुणे, दिल्ली अशा विविध ठिकाणी राहणारी मित्रमंडळी या ग्रुप्समुळे एकत्र बांधली गेली आहेत. वेगवेगळ्या क्षेत्रांमध्ये काम करणारे मित्र याच ग्रुपच्या निमित्ताने भेटतात. पूर्वी फारसे लक्षात न राहणारे एकमेकांचे वाढदिवस व्हॉट्सअॅप ग्रुपमुळे एकत्र जमून साजरे केले जात आहेत. वर्षानुवर्षे दुरावलेल्या मित्रांना भेटण्याची संधी या व्हॉट्सअॅपमुळे उपलब्ध झाली आहे. शाळा- कॉलेजच्या वार्षिक स्नेहसंमेलनाला हजर राहण्याचे मनसुबे आखणे, परदेशी असणारे मित्र मायदेशी आल्यानंतर त्याचे जंगी स्वागत व्हॉटसअॅपच्या ग्रुपवर प्लॅन करणे सर्रास चालते. व्हॉट्सअॅपमुळे मैत्रीला नवा रंगच मिळाला आहे.
गप्पा आणि बरंच काही…
मित्रमंडळीच्या व्हॉटसअॅप ग्रुप्सवर गप्पांच्या पलीकडे अनेक माहितीपर गोष्टी चर्चिल्या जातात. मैत्रिणींच्या ग्रुप्समध्ये रेसिपीपासून ब्युटी टिप्स आदी विषयांवर चर्चा होते. मुलामुलींचे करियर ऑप्शन्स, पिकनिक प्लॅन ठरविले जातात. तर मित्रांचे ग्रुप्स मात्र जास्तीत जास्त मजा, मस्तीच्याच मूडमध्ये असतात.
ग्रुप्सची काही भन्नाट नावे…
१९९९ वझेटियन्स, ९८ मो. ह., माझी शाळा, शाळेच्या बाकावर, कॉलेज कट्टा, दुनियादारी