नवी दिल्लीच्या करोलबाग परिसरातील हॉटेल अर्पित पॅलेसमध्ये पहाटे साडेचारच्या सुमारास आग लागली. या आगीत आतापर्यंत १७ जणांचा मृत्यू झाल्याची माहिती आहे. आग हॉटेलच्या वरच्या मजल्यावर लागली होती. आगीची माहिती मिळताच अग्निशमन दलाच्या २६ गाड्या घटनास्थळी दाखल झाल्या. यानंतर सुमारे चार तासांनी आगीवर नियंत्रण मिळवण्यात आलंय.
हॉटेल अर्पितच्या आगीत अनेक जण जखमी झालेत. त्यांना हॉस्पिटलमध्ये दाखल करण्यात आलं आहे. राममनोहर लोहिया रुग्णालयात दाखल केलेल्या जखमींपैकी १३ जणांचा मृत्यू झाला आहे. तर लेडी हार्डिंग रुग्णालयात दाखल कलेल्या ५ जखमींपैकी ३ जणांचा मृत्यू झाला. गंगाराम हॉस्पिटलमध्येही काही जखमींना दाखल करण्यात आलं आहे. हॉटेल अर्पितमध्ये पहाटे साडेचारच्या सुमारास आग लागली होती. याची माहिती मिळताच अग्निशमन दलाच्या गाड्या घटनास्थळी दाखल झाल्या. आगीमुळे हॉटेलमध्ये एकच गोंधळ उडाला आणि पळापळ सुरू झाली. तर जीव वाचवण्यासाठी इमारतीतून अनेकांनी खाली उड्या मारल्या. यामुळे जखमींची संख्या वाढली.
आगीवर सकाळी ८ वाजेच्या सुमारास नियंत्रण मिळवण्यात यश आलं. हॉटेलमधून ३० ते ३५ जणांना सुरक्षितपणे बाहेर काढण्यात आलंय. तसंच आगीत मृत्यू झालेल्यांचे मृतदेह बाहेर काढण्यात आले आहेत. आग काशामुळे लागली हे अद्याप स्पष्ट झालेलं नाही.