महाराष्ट्रातील सर्व नागरी सहकारी बँकांतील नोकरभरतीची प्रक्रिया पारदर्शक, निष्पक्ष आणि सचोटीची व्हावी यासाठी भरती प्रक्रिया ऑनलाइन पद्धतीने करण्याचा निर्णय राज्य सरकारच्या सहकार विभागाने घेतला आहे. यासाठी त्रयस्थ संस्थेची नियुक्ती करावी लागणार आहे.
राज्यातील काही नागरी सहकारी बँकांनी कर्मचारी-अधिकारी मनुष्यबळाचा पॅटर्न निश्चित करून सेवाभरती प्रक्रिया राबविली आहे. मात्र ती राबविताना ऑफलाइन परीक्षा झाल्यानंतरकाही बँकांच्या प्रशासनांविरोधात गंभीर तक्रारी सरकारला प्राप्त झाल्या होत्या. या तक्रारींची चौकशी केल्यानंतर भरतीची प्रक्रिया पारदर्शक झाली नसल्याचे निदर्शनास आले होते. या सदोष भरती प्रक्रियेमुळे बँकांच्या प्रशासनावरदेखील परिणाम होऊ शकतो. बँकेवर विश्वास ठेवून गुंतवणूक करणाऱ्या ग्राहकहिताला बाधा पोहोचू शकते. बँकिंग क्षेत्र खूपच विस्तारले आहे. बँकांच्या माध्यमातून अनेक महत्त्वाचे आर्थिक व्यवहार होत असतात. अत्याधुनिक तंत्रज्ञानही आले असून, त्याची माहिती व जाण असलेला कर्मचारी अधिकारी वर्ग बँकांमध्ये असायला हवा, त्यामुळे सरकारने हा निर्णय घेतला आहे.
नागरी सहकारी बँकांतील ऑनलाइन भरती प्रक्रिया राबविताना त्रयस्थ संस्थेची नियुक्ती करावी लागणार असून, त्यासाठी नोंदणीकृत संस्थांना हे काम द्यावे लागेल. इंडियन बँकिंग पर्सनल सिलेक्शन बोर्ड, वैकुंठ मेहता इन्स्टिट्यूट पुणे, इंडियन इन्स्टिट्यूट ऑफ बँकिंग अँड फायनान्स आदी संस्थांपैकी एकीची नियुक्ती करावी लागणार आहे.
लक्ष्मीदर्शनाला पायबंद
सहकार क्षेत्रातील नागरी सहकारी बँकांमध्ये नोकरभरतीत संबंधित बँकेच्या संचालक मंडळाच्या नात्या-गोत्यातील व वशिलेबाजीच्या मंडळीचा अधिक प्रभाव असतो. या भरतीत मोठ्या प्रमाणात होणाऱ्या लक्ष्मीदर्शनाला ऑनलाइन भरती प्रक्रियेमुळे पायबंद बसण्यास मदत होणार आहे.