महागड्या स्पोर्टस् बाइकची ट्रायल घेण्यासाठी आलेला ग्राहक ट्रायल घेता घेता पसार झाला. वाहनचोरीचा हा धक्कादायक प्रकार पाथर्डी फाटा परिसरातील शिवाजी पुतळयाजवळ घडला. या प्रकरणी अंबड पोलिस स्टेशनमध्ये फसवणुकीसह अपहाराचा गुन्हा दाखल करण्यात आला.
याबाबत हिमांशू विजय शर्मा (वय २३, रा. कॉन्टोंमेंट हॉस्पिटल परिसर, देवळाली कॅम्प) याने पोलिसांकडे फिर्याद दिली. हिमांशू शर्माकडे केटीएम ड्यूक २०० सीसी ही स्पोर्ट बाइक (एमएच ०१ बीई ६३७४) होती. काही कारणास्तव त्याला ही बाइक विकायची असल्याने ३५ हजार रुपये किंमत ठरवून त्याने तशी जाहिरात ऑनलाइन संकेतस्थळावर प्रसिद्ध केली. या जाहिरातीनुसार ७४९९७९१७०० या मोबाइल क्रमांकावरून सागर साठे नावाच्या व्यक्तीने हिमांशूशी संपर्क साधला. सदरची स्पोर्ट बाइक घेण्याची इच्छा संबंधित चोरट्याने व्यक्त केली. मात्र, हा सौदा होण्यापूर्वी आपल्याला बाइक पाहायची असल्याचे सागर साठे नावाच्या व्यक्तीने हिमांशूला सांगितले. त्यानुसार, दोघांनी भेटण्याचे ठिकाण पाथर्डी फाटा ठरविले. मंगळवारी (दि. ८) दुपारी ३ वाजेच्या सुमारास हिमांशू आपल्या दुचाकीसोबत पाथर्डी फाटा येथील शिवाजी महाराज पुतळ्याजवळ पोहचला. तिथे आलेल्या संशयित आरोपी सागरने बाइक पाहून ती चालवण्याची इच्छा व्यक्त केली. हिमांशूला यात काही विशेष वाटले नाही. त्याने लागलीच बाइक संशयिताच्या स्वाधीन केले. संशयित आरोपीने परिसरात गाडी चालवून पाहायला सुरुवात केली. हळूहळू तो दूरपर्यंत गेला. मात्र ट्रायल घेणारा संशयित सागर पुन्हा परतलाच नाही. यामुळे हैराण झालेल्या हिमांशूने परिसरात त्याचा शोध घेतला. दोन ते तीन दिवसानंतरही संशयित सागरचा कोणताही थांगपत्ता लागला नाही. अखेर शनिवारी (दि. १२) या प्रकरणी अंबड पोलिस ठाण्यात संशयिताविरोधात फसवणुकीसह अपहाराचा गुन्हा दाखल करण्यात आला. पुढील तपास पोलिस उपनिरीक्षक पवार करीत आहेत.