मृत व्यक्तीच्या बँक खात्यातून साडेदहा लाख रुपये काढल्याचा धक्कादायक प्रकार गोवंडीमध्ये घडला आहे. याप्रकरणी गोवंडी पोलिसांनी एकाला अटक केली असून, दुसरा आरोपी फरार आहे. राल्फ कुटिन्हो (५७) असे मृत व्यक्तीचे नाव असून, ते मर्चंट नेव्हीत निवृत्त कॅप्टन होते.
गोवंडीतील निर्मल गंगा इमारतीत अविवाहित राल्फ कुटिन्हो वास्तव्यास होते. गेल्या वर्षी मे महिन्यात अखेरीस त्यांचे निधन झाले. घरात एकटेच राहात असल्याने आणि जवळ कोणीही राहत नसल्याने त्यांचे निधन झाल्याचे २ जून रोजी लक्षात आहे. येथील रहिवाशांनी याबाबत नेहरुनगर येथे राहणारा त्यांचा भाऊ रिचर्ड कुटिन्हो यांना कळवले. रिचर्ड हे देखील वृद्ध असल्याने त्यांनी भावावर अंत्यसंस्कार करण्यासाठी परिसरातील चार तरुणांची मदत घेतली. ५ जून रोजी रेहान इस्माइल मेमन, कय्युम खान आणि त्यांच्या दोन साथीदारांना साफसफाई करण्यासाठी रिचर्ड यांनी भावाच्या घरी पाठविले. साफसफाई करत असताना त्यांना घरात दोन डेबिट कार्ड, दोन मोबाइल सापडले. या वस्तू स्वत:कडे ठेवल्या. ६ जून ते २० जून दरम्यान राल्फ यांच्या कार्डचा वापर करून चौघांनी स्टेट बँक ऑफ इंडिया आणि कोटक महिंद्रा बँकांमधून १० लाख ५० हजार रुपये काढले. गोवंडी पोलिस ठाण्याचे वरिष्ठ निरीक्षक माने यांच्या मार्गदर्शनाखाली सहायक निरीक्षक दीपक खरात आणि पथकाने रेहानला अटक केली. त्याने हे पैसे कसे काढले आणि इतर तिघांचा यात किती सहभाग आहे याचा तपास पोलिस करत आहेत.
राल्फ यांचा कॅनडा येथील भाऊ रोनाल्ड कुटिन्हो यांनाही भावाच्या मृत्यूबाबत समजले. ते गेल्यावर्षी ऑगस्ट महिन्यात मुंबईत आले होते. राल्फ यांच्या खात्यातून मोठी रक्कम गायब असल्याचे त्यांच्या लक्षात आले. त्यांनी राल्फ वापरत असलेले सिमकार्ड आपल्या मोबाइलमध्ये टाकून सुरू केले, त्यावेळी पैसे काढल्याचे अनेक मेसेज आले. त्यांनी याबाबत गोवंडी पोलिस ठाण्यात तक्रार केली.