रत्नागिरी जिल्ह्यात दापोली- खेड मार्गावर शुक्रवारी सकाळी भीषण अपघात झाला असून या अपघातात पाच जणांचा मृत्यू झाला आहे. तर दोन जण या अपघातात जखमी झाले आहेत. डंपरने एका कारला धडक दिल्याने हा अपघात झाला आहे.
दापोली- खेड मार्गावर मॅक्सिमो गाडीला विरुद्ध दिशेने येणाऱ्या डंपरने धडक दिली. ही धडक इतकी भीषण होती की पाच जणांचा घटनास्थळीच मृत्यू झाला. मृतांमध्ये दोन महिला आणि तीन पुरुषांचा समावेश आहे. या अपघातात दोन जण गंभीर जखमी झाले असून त्यांच्यावर रुग्णालयात उपचार सुरु आहेत. अपघातातील मृतांची नावे अद्याप समजू शकलेली नाही. महामार्गावरील नारपोली गावाजवळील वळणावर हा भीषण अपघात झाला आहे.