घरामध्ये फॅनला, खिडक्यांना, स्विचजवळ, बाथरूममध्ये दिसणार नाहीत अशा ठिकाणी कॅमेरे लावून तब्ब्ल दीड वर्ष भाडेकरू मुलींचे फोटो आणि व्हिडिओ एका ४७ वर्षांच्या घरमालकाने काढल्याची घटना मुंबईच्या गिरगाव परिसरात घडली आहे. याप्रकरणी डीबी रोड पोलीस स्थानकात पीडित मुलींनी तक्रार दाखल केली असून पुढील कार्यवाही सुरू आहे.
पोलिसांनी दिलेल्या माहितीनुसार पीडित मुली वर्षभरापासून या घरात राहत होत्या. आरोपी घरमालक अविवाहित असून त्याच्या आई-वडिलांसोबत राहतो. काही दिवसांपासून त्या मुलींची वाक्य तो त्यांच्याच स्वरात त्यांना ऐकवत होता. ही वाक्य त्या मुली फक्त खोलीत इतर कोणी नसताना बोलल्या होत्या. पण ती वाक्य जशीच्या तशी परत सांगितल्यामुळे त्या सावध झाल्या. सुरुवातीला तो लपून त्यांच्या गप्पा ऐकतोय अशी शंका त्यांना आली. पण एक दिवशी खोलीत एक छोटेसे इलेक्ट्रिक अॅडॅपटर त्यांना दिसले. हे छोटेसे यंत्र काय आहे याची त्यांना शंका आल्यामुळे त्यांनी त्यावर रुमाल टाकून ते झाकले. नंतर तडक घरमालक खोलीत आला आणि त्याने रुमाल काढायला सांगितला.
मग संबंधित मुलींना त्या यंत्राची भीती वाटू लागली. त्यांनी त्याचे फोटो काढले आणि इंटरनेटवर शोध घेतला आणि त्यांची भीती खरी ठरली. ते छोटेसे अॅडेपटर एक कॅमेराच होता. त्या मुलींनी लगेच डीबी रोड पोलीस स्टेशन गाठले आणि पोलिसांना सगळा प्रकार सांगितला. यानंतर १९ डिसेंबरला पोलिसांनी माहिती तंत्रज्ञान कायद्याअंतर्गत आरोपी घरमालकाला अटक केली. त्याच्या लॅपटॉपवर वर्षभर जुने व्हिडिओ त्यांना सापडले. हे व्हिडिओ त्याने कुठे शेअर केले आहेत का याचा शोध सुरू आहे. तसंच याआधी असं काही त्याने केलं आहे का याचाही तपास पोलीस करत आहेत
पोलिसांनी १९ डिसेंबरला आरोपीला अटक केली खरी पण २२ डिसेंबरला त्याची जामिनावर सुटका करण्यात आली. माहिती तंत्रज्ञान कायदा अंतर्गतचे गुन्हे जामिनपात्र असल्यामुळे असे आरोपी लगेच सुटतात. पण या घटनांचे गांभीर्य पाहता हा कायदा अजून कडक करून असे गुन्हे अजामिनपात्र करण्याची गरज आहे असं एका वरिष्ठ पोलीस अधिकाऱ्याने सांगितलं आहे.