विजया बँक, देना बँक आणि बँक ऑफ बडोदा या तिन्ही बँकांच्या विलीनीकरणाच्या विरोधात सार्वजनिक आणि खासगी बँकांमधील दहा लाख कर्मचाऱ्यांनी येत्या बुधवारी (२६ डिसेंबर) एकदिवसीय संपाचे आयोजन केले आहे. यापूर्वी शुक्रवारी सार्वजनिक क्षेत्रातील बँकांच्या अधिकाऱ्यांच्या संघटनेने विविध मागण्या आणि वेतनाच्या संदर्भात संप केला होता.
केंद्र सरकारने सप्टेंबरमध्येच या तिन्ही बँकांच्या विलीनीकरणाची घोषणा केली होती. या निर्णयामुळे देशातील तिसरी सर्वांत मोठी बँक अस्तित्वात येण्याचा मार्ग मोकळा झाला आहे. सध्या रिझर्व्ह बँकेतर्फे विजया आणि देना बँकेवर आर्थिक निर्बंध घालण्यात आले आहेत. ‘युनायटेड फोरम ऑफ बँक युनियन’ने (यूएफबीयू) दिलेल्या माहितीनुसार हे विलीनीकरण ग्राहकांसाठी हितावह असणार नाही. त्यामध्ये बँका आणि ग्राहकांचे नुकसान होण्याची शक्यता आहे. ‘यूएफबीयू’ ही नऊ बँक युनियनची एकत्रित संघटना आहे. त्यामध्ये ‘ऑल इंडिया बँक ऑफिसर्स कॉन्फेडेरेशन’, ‘ऑल इंडिया बँक एम्प्लॉइज असोसिएशन’ आणि ‘नॅशनल ऑर्गनायझेशन ऑफ बँक वर्कर्स’ आदींचा समावेश आहे.
‘कोणत्याही परिस्थितीत २६ डिसेंबरचा संप होणर आहे,’ अशी माहिती नॅशनल ऑर्गनायझेशन ऑफ बँक वर्कर्स’च्या उपाध्यक्ष अश्विनी राणा यांनी दिली. युनियनच्या मत केंद्र सरकार विलीनीकरणाच्या माध्यमातून बँकांचा आकार वाढवू पाहात आहे. मात्र, देशातील सार्वजनिक क्षेत्रातील बँकांचे विलीनीकरण करून एकच बंक स्थापन केली तरी, जगातील पहिल्या दहा बँकांमध्ये स्थान मिळण्याची शक्यता कमीच आहे.