ठाणे मध्यवर्ती कारागृहातील एका कैद्याकडे पैसे आणि नशेच्या गोळ्या सापडल्या आहेत. कैद्याविरुद्ध ठाणेनगर पोलिस ठाण्यात गुन्हा दाखल करण्यात आला असून गोळ्या नेमक्या कशाच्या आहेत हे तपासणीनंतरच कळू शकेल. अशी माहिती एका पोलिस अधिकाऱ्याने दिली.
पुनित उर्फ अजय कृष्णचंद तिवारी (३०) असे या कैद्याचे नाव आहे. मोक्का अंतर्गत त्याच्याविरुद्ध कारवाई झालेली आहे. न्यायबंदी असल्याने त्याला ठाणे कारागृहात ठेवण्यात आले आहे. दरम्यान, कारागृहातील बॅरेकमध्ये भांडणे सुरु असताना पुनीतकडे गोळ्या असल्याची बाब पुढे आली. कारागृह प्रशासनाने पुनीतला बोलावून गोळ्याबाबत विचारल्यानंतर त्याने आपल्याकडील सहा गोळ्या दाखवल्या. गोळ्यासह पुनीतकडे पाचशे रुपयांच्या पाच नोटा अर्थात अडीच हजार रुपयेही आढळले असून कारागृह कर्मचाऱ्याने याप्रकरणी पोलिस ठाण्यात तक्रार केली आहे. परंतु आरोपीकडे पैसे आणि गोळ्या आल्या कोठून, याबाबत गूढ निर्माण झाले आहे. शिवाय गोळ्या सफेद रंगाच्या असून आरोपीला चौकशीसाठी ताब्यात घेतल्यानंतरच संपूर्ण उलगडा होऊ शकतो, असे पोलिस अधिकाऱ्यांचे म्हणणे आहे. मात्र ठाणे कारागृहात यापूर्वीही इतर कैद्यांकडे वेगवेगळ्या वस्तू सापडलेल्या आहेत. सुरक्षा व्यवस्था भक्कम असूनही कैद्यांकडे वस्तू येतात कोठे. याबाबत प्रश्चचिन्ह निर्माण झाले आहेत.