झोपेसाठी वापरण्यात येणाऱ्या औषधांचा कुत्ता गोळी या नावाखाली नशेसाठी वापर होण्याच्या प्रकरणात अन्न व औषध प्रशासनाला (एफडीए) मोठे यश मिळाले आहे. हरियाणा येथून सुरू झालेल्या कुत्ता गोळीचा प्रवास गुजरातमधून धुळे आणि पुढे मालेगाव असा होत असल्याचे समोर आले आहे.
मालेगावमध्ये सुरू असलेल्या नशेच्या बाजाराची पाळेमुळे परराज्यात असल्याचे संकेत प्रथमपासूनच व्यक्त होत होते. त्यातच मागील महिन्याच्या अखेरीस मालेगाव पोलिसांनी इब्राहिम अहमद अब्दुलल गणी उर्फ धुरी या सराईत आरोपीस अटक केली. सुरत येथे दुसऱ्या पत्नीच्या घरी दडून बसलेला धुरी मालेगावमध्ये कुत्ता गोळीच्या तस्करीच्या एका प्रकरणात फरार होता. सूरत येथून आणलेल्या गोळ्या तो त्याच्या साथिदारांसह मालेगावमध्ये वितरित करीत होता. ‘एफडीए’ने धुरीकडे सखोल चौकशी केली.
याबाबत सूत्रांनी सांगितले की, झोपेसाठी वापरण्यात येणाऱ्या गोळ्या शेड्युल एक्समध्ये असून, डॉक्टरांच्या सल्ल्याशिवाय त्यांची विक्री वा सेवन करता येत नाही. मालेगावमध्ये मात्र बेकायदेशीरित्या या गोळ्या कुत्ता गोळी म्हणून मिळत होत्या. मालेगावमध्ये मागील चार ते पाच महिन्यातच ‘एफडीए’ने जवळपास ६० हजार टॅब्लेट्स जप्त केल्या आहेत. यावरून या गोळ्यांच्या मागणीचा अंदाज येतो. थेट मेंदूशी संबंधीत या गोळ्या मालेगावमध्ये परराज्यातून येतात. या गोळ्यांची निर्मिती हरियाणा राज्यात होते. त्यानंतर त्या गुजरात राज्यातील सुरत आणि अहमदाबाद येथे पोहचतात. तेथून या गोळ्यांची धुळेमार्गे मालेगावमध्ये तस्करी करण्यात येते.
काळ्याबाजाराचे केंद्र गुजरातच
सूत्रांच्या दाव्यानुसार शेड्युल एक्स वर्गात मोडणाऱ्या या गोळ्यांचा काळाबाजार गुजरातमधील अहमदाबाद आणि सूरत येथूनच होतो. या पार्श्वभूमीवर ‘एफडीए’चे एक पथक हरियाणासह गुजरात राज्यात तपास करीत आहे. उत्पादन आणि विक्री या साखळीत या गोळ्या तस्करांच्या हाती कोठे आणि कशा पद्धतीने मिळतात, त्यात नेमकी कोण सहभागी आहेत याचा तपास ‘एफडीए’चे पथक करणार आहे.