‘आपल्यामागे अनेक लोक आहेत, त्यामुळे आपण बहुमत कसे मिळेल याकडे लक्ष दिले पाहिजे. हेच आपले पहिले उद्दिष्ट आहे. शरद पवार पंतप्रधान आणि मी राज्याचा मुख्यमंत्री होऊ शकतो, असे आजिबात बोलू नका. तुमचं विचारणं काहींच्या डोळ्यात खुपते… त्यातून गोंधळ होऊ शकतो,’ या शब्दात अजित पवार यांनी बारामती येथे आयोजित एका कार्यक्रमात कार्यकर्त्यांना सल्ला दिला.
स्थानिक नेत्याने आपल्या भाषणात पवार यांचा उल्लेख भावी मुख्यमंत्री म्हणून केला. तोच धागा पकडून ‘मला भावी मुख्यमंत्री आणि शरद पवार साहेबांना भावी पंतप्रधान म्हणू नका,’अशी विनंती अजित पवार यांनी केली. ‘भावी मुख्यमंत्री आणि भावी पंतप्रधान म्हटल्याने कोणाच्या भावना दुखावल्या जातात, तर काहींच्या डोळ्यात खुपते. त्यातून पाडापाडी होऊ शकते. त्यामुळे यापुढे असं काहीही म्हणू नका,’ असा इशाराही देण्यास पवार विसरले नाहीत. त्यापेक्षा आघाडीला बहुमत कसे मिळवता येईल याकडे सर्वांनी लक्ष द्यावे, अशी विनंतीही त्यांनी केली.
या वेळी त्यांनी माजी खासदार निवेदिता माने यांच्या शिवसेनाप्रवेशाविषयीही भाष्य केले. ‘कोणी काय करावे, हा ज्याचा-त्याचा प्रश्न आहे,’ असेही ते म्हणाले. या वेळी त्यांनी उद्धव ठाकरे यांच्यावरही टीका केली. पाच राज्यांतील निवडणूक निकालात भाजपाची पिछेहाट झाली आहे. त्यामुळे कर्जमाफी देऊन गमावलेला जनाधार मिळवण्याचा केविलवाणा प्रयत्न भाजपाकडून सुरू आहे अशी टीकाही त्यांनी केली.