शाहिद कपूरच्या हैदर या चित्रपटात छोटीशी भूमिका साकारणारा १३ वर्षांचा साकिब बिलाल चार वर्षांत दहशतवादी झाला आणि मागच्या रविवारी सैन्याशी झालेल्या चकमकीत तो ठार झाला. या अनपेक्षित घटनेमुळे साकीबचे कुटुंबीय पुरते हादरले आहेत.
१३ वर्षांचा साकीब बिलाल श्रीनगरजवळच्या एका छोट्याशा गावाचा रहिवाशी होता. हैदर चित्रपटात काश्मीरमधील निवडणुकांच्या एका छोट्याश्या सीनमध्ये त्याने काश्मीरी मुलाची भूमिका वठवली होती.’ तेव्हा मीच त्याला श्रीनगरला घेऊन गेलो होतो. विशाल भारद्वाजांनी स्वत: त्याची निवड केली होती. तो असं पाऊल उचलेल असं कधीच मला जाणवलं नव्हतं.’ अशी माहिती साकीबचे काका एजाझ परे यांनी दिली आहे.
साकीबला अभिनयात रस होता. त्याने काही काश्मीरी नाटकांमध्ये कामही केलं होतं. एजाझ परे यांच्या लग्नात त्याने काश्मीरी गाणीही गायली होती. त्याच्या नाटकाच्या ताफ्यासोबत ओडिशातही तो जाऊन आला होता. पण त्याचं दहशतवादी होणं अनपेक्षित होतं.
३१ ऑगस्ट २०१८ एकाएकी तो घर सोडून निघून गेला होता. त्यानंतर त्याच्या कुटुंबीयांचा त्याच्याशी संपर्क झाला नाही. मुद्दसिर परे नावाच्या त्याच्या मित्राच्या प्रभावाखाली येऊन तो लष्कर-ए-तोयबामध्ये सामिल झाला होता. ‘ साकीबसारखा, मौजी,सरळमार्गी मुलगा कधी दहशतवादी होईल हे आम्हाला स्वप्नातही वाटलं नव्हतं अशी प्रतिक्रिया त्याच्या वडिलांनी दिली आहे.