आग्रा-लखनऊ एक्स्प्रेसवेवरील वाढत्या अपघाताला आळा घालण्यासाठी उत्तर प्रदेश एक्स्प्रेसवे इंडस्ट्रियल डेव्हलपमेंट अॅथोरिटी (UPEIDA) ने एक अनोखी शक्कल लढवली आहे. गाडी चालकांची झोप मोडावी यासाठी आग्रा-लखनऊ एक्स्प्रेसवेवर चालकांना मोफत चहा-कॉफी देण्याचा निर्णय UPEIDA ने घेतला आहे.
उत्तर प्रदेश एक्स्प्रेसवे इंडस्ट्रियल डेव्हलपमेंट अॅथोरिटी (UPEIDA) ने आग्रा-लखनऊ एक्स्प्रेसच्या ३०२ किलोमीटर लांबीच्या एक्स्प्रेसवरील अपघात कमी करण्यासाठी मोफत चहा आणि कॉफी देण्याचा निर्णय घेतला आहे. एक्स्प्रेसववेवर रात्री १० ते सकाळी ६ च्या दरम्यान मोठ्या प्रमाणात अपघात होत असल्याचे निदर्शनास आले आहे. यामुळे या काळात आग्रा-लखनऊ एक्स्प्रेसवेवर मोफत चहा व कॉफी देण्याचा निर्णय घेण्यात आल्याची माहिती टोल प्लाझाचे सहायक मॅनेजर अमित चंदेल यांनी दिली आहे. जानेवारी २०१८ पासून या महामार्गावर शंभरहून अधिक लोकांचा मृत्यू झाला असून ३०० हून अधिक प्रवासी जखमी झाले आहेत. रात्रीच्यावेळी गाडी चालकांच्या डोळ्यावर झोप असल्याने अपघात होत आहेत. रात्री १० ते सकाळी ६ पर्यंत गाडी चालकांना चहा-कॉफी मोफत देण्यात येणार आहे.
गाडी चालकांना चहा-कॉफी देण्यासाठी या महामार्गावर ३० किलोमीटरच्या प्रत्येक अंतरावर चहा-कॉफीचा स्टॉल लावण्यात येणार आहे. चार चाकी वाहनातील गाडी चालक आणि अन्य एका प्रवाशाला चहा-कॉफी मोफत देण्यात येणार आहे. गाडीतील अन्य प्रवाशाला चहा-कॉफी हवी असल्यास त्यासाठी मात्र पैसे मोजावे लागतील, असे चंदेल यांनी सांगितले. एक्स्प्रेसवे वर उभ्या असलेल्या आणि दुर्घटनाग्रस्त वाहनांमुळे सुद्धा अपघातात वाढ झाल्याचे एका अधिकाऱ्याने सांगितले.