घरात हप्त्यांवर इलेक्ट्रॉनिक्स वस्तू खरेदी करताय… आपली सर्व कागदपत्रे शोरूममध्ये जमा केलीत… पण जरा काळजी घ्य. बजाज फायनान्स कंपनीच्या ग्राहकांचा डेटा वेब पोर्टलवरून चोरून त्यांच्या नावाने परस्पर कर्ज घेणाऱ्या टोळीचा मुंबई पोलिसांच्या गुन्हे शाखेच्या अधिकाऱ्यांनी नुकताच पर्दाफाश केला. पोलिसांनी याप्रकरणी तिघांनी अटक केली असून त्यांनी अनेकांच्या नावाने कर्ज घेतल्याचे उघडकीस आले आहे. या तिघांवर मुंबईतील विविध पोलिस ठाण्यात अनेक गुन्हे दाखल आहेत.
बजाज फायनान्स कंपनीच्या वस्तू ग्राहकांना इलेक्ट्रॉनिक्स वस्तू घेण्यासाठी वित्तपुरवठा केला जातो. या कंपनीच्या वेबसाइटवरुन ग्राहकांना अर्ज करणे, कर्ज मंजूर करणे ही सर्व प्रक्रिया ऑनलाइन केली जाते. यासाठी विविध शोरूम्सना यूजर आयडी आणि पासवर्ड देण्यात आला आहे. असे असतानाही वेबसाइटवरील ग्राहकांच्या नावे कर्ज घेऊन नकळत वस्तू खरेदी केल्या जात होत्या. कंपनीतर्फे ग्राहकांना विचारणा केल्या जात असल्याच्या तक्रारी वाढत होत्या. अशा प्रकारची फसवणूक करणारे तिघेजण वरळी आणि बदलापूर परिसरात राहत असल्याची माहिती मालमत्ता कक्षाचे सहायक निरीक्षक लक्ष्मीकांत साळुंखे यांना मिळाली. वरिष्ठ पोलिस निरीक्षक सुनील बाजारे यांच्या मार्गदर्शनाखाली मालमत्ता कक्षाच्या पथकाने वरळी आणि बदलापूर येथे छापा टाकून अबूबकर मोहम्मद साब शेख, रमीज मोहम्मद हुसेन शेख, राजेश बाबुराव वडलुरी या तिघांना पकडले. चौकशीमध्ये या तिघांनी बजाज फायनान्स कंपनीची बनावट कागदपत्रे तयार करून आतापर्यत १५ जणांच्या नावे कर्ज घेऊन फसवणूक केल्याचे उघडकीस आले आहे. या तिघांचा भोईवाडा, अँटॉप हिल, विक्रोळी, भांडुप, खेरवाडी, भाईंदर, ठाणे-कोळसेवाडी या पोलिस ठाण्यांमध्ये दाखल गुन्ह्यांमध्ये या तिघांचा सहभाग असल्याचे आढळले आहे.
अशी होते डेटा चोरी
रमीज शेख हा लालबाग येथील एका प्रसिद्ध इलेट्रॉनिक्स वस्तूंच्या शोरूममध्ये नोकरीला होता. बजाज फायनान्सच्या ग्राहकांचे काम तो करायचा. नोकरी सोडल्यानंतर त्यांनी युजर आयडी आणि पासवर्डचा वापर करून ग्राहकांचा तपशील मिळवला. त्यांची बनावट कागदपत्रे तयार केली. त्यावर अनेक ठिकाणी ऑनलाइन खरेदी केली. या खरेदीच्या हप्ते भरण्यासाठी ग्राहकांना फोन येऊ लागले त्यावेळी हा प्रकार उघडकीस आला.