सार्वजनिक बांधकाम विभागाकडून (पीडब्लूडी) सिंहगडाकडे जाणाऱ्या घाट रस्त्याच्या दुरुस्तीचे काम हाती घेण्यात आले असल्याने हा रस्ता सुमारे अडीच महिने पर्यटकांसाठी बंद राहणार आहे. जिल्हाधिकारी नवल किशोर राम यांनी याबाबतचे आदेश दिले असून, काम पूर्ण झाल्यानंतर या मार्गावरील वाहतूक पूर्ववत केली जाणार आहे.
घाट रस्त्यावर ठिकठिकाणी खड्डे पडले असल्याने पर्यटकांना त्रास होत आहे. या रस्त्याच्या दुरुस्तीला मुहूर्त मिळाला असून, दुरुस्तीचे काम सुरू करण्यात आले आहे. त्यासाठी हा रस्ता बंद करण्यात आला आहे. सुमारे अडीच महिन्यांमध्ये हे काम पूर्ण केले जाणार असल्याचे ‘पीडब्ल्यूडी’ विभागाकडून सांगण्यात आले.
घाट रस्त्यावरील पायथ्यापासून काही किलोमीटरपर्यंतचा रस्ता सुस्थितीत आहे. उर्वरित रस्त्याचे डांबरीकरण आणि काही भाग हा सिमेंट क्राँकीटचा तयार केला जाणार आहे. त्यासाठी जिल्हाधिकारी राम यांच्या आदेशानुसार हा रस्ता अडीच महिने बंद ठेवण्यात येणार असल्याचे ‘पीडब्ल्यूडी’ विभागाकडून स्पष्ट करण्यात आले.
पावसाळ्यापासून रस्त्यावर खड्डे पडले आहेत. सुमारे दीड वर्षांपूर्वी रस्त्यावर दरड कोसळली होती. त्यामुळे काही काळ गडावरील वाहतूक बंद करण्यात आली होती. दुरुस्तीचे तात्पुरते काम केल्यानंतर वाहतूक पूर्ववत झाली. त्यानंतर ‘पीडब्ल्यूडी’ विभागाकडून हाती घेण्यात आलेले काम अद्याप पूर्ण झालेले नाही. आता हे काम अडीच महिन्यामध्ये पूर्ण करण्यात येणार आहे.
गडावर शनिवार आणि रविवारी मोठ्या प्रमाणावर गर्दी असते. रस्त्यावर खड्डे असल्याने पर्यटकांना त्रास होतो. रस्त्याच्या दुरुस्तीच्या टेंडर प्रक्रियेला विलंब लागल्यामुळे काम पूर्ण होऊ शकले नव्हते. ही प्रक्रिया पूर्ण झाली असल्याने आता दुरुस्तीचे काम हाती घेण्यात आले आहे.