जोगेश्वरी येथे राहणाऱ्या वृद्धेच्या घरात घुसून चाकूच्या धाकावर तिला लुटणाऱ्या चोरट्यास जोगेश्वरी पोलिसांनी मंगळवारी अटक केली. सतीश राऊत असे त्याचे नाव असून, त्याच्यावर २२पेक्षा अधिक गुन्हे दाखल असल्याचे चौकशीतून समोर आले आहे.
जोगेश्वरी येथील एका सोसायटीमध्ये २९ नोव्हेंबरला सतीश राऊत शिरला. शेजारी वैद्यकीय शिबीर आयोजित केले असून सोसायटीमधील वृद्धांची माहिती गोळा करीत असल्याचे त्याने सुरक्षारक्षकाला सांगितले. सोसायटीमध्ये वृद्धांची माहिती घेत असताना एक महिला घरात एकटीच असल्याचे त्याने पाहिले. सतीश घरात घुसला आणि चाकूचा धाक दाखवून जे काही मिळेल ते घेऊन पळाला.
याबाबत जोगेश्वरी पोलिस ठाण्यात गुन्हा दाखल करण्यात आला. वरिष्ठ पोलिस निरीक्षक लालासाहेब शेटे यांच्या मार्गदर्शनाखाली उपनिरीक्षक पाटील आणि जाधव यांनी सुमारे पाच किलोमीटर परिसरातील ४० सीसीटीव्हींचे फुटेज तपासले. त्यातून संशयिताचा पुसटसा चेहरा दिसला. त्यावरून पोलिसांनी तो राहत असलेला परिसर शोधला. दोन दिवस पोलिस या ठिकाणी सापळा लावून होते. अखेर ४ डिसेंबरला सतीश मैत्रिणीला भेटायला सहार गाव याठिकाणी आला आणि पोलिसांच्या जाळ्यात अडकला. सतीशच्या विरोधात चोरी आणि जबरी चोरीचे २२ गुन्हे दाखल आहेत.