तालुक्यातील राळेगण थेरपाळ येथील चार वर्षाच्या चिमुरडीवर शेजारीच रहात असलेल्या नराधमाने खेळण्यास बोलावून अत्याचार केल्याची घटना २१ नोव्हेंबर रोजी घडली. गावातीलच काही प्रतिष्ठित नागरिकांनी हे प्रकरण दाबण्याचा प्रयन्त केला. मात्र, तब्बल तीन दिवसानंतर चाइल्ड लाइनच्या माध्यमातून उघड झाला. पारनेर पोलिसांनी तत्काळ आरोपीस अटक केली आहे.
या बाबत पोलिस सूत्रांकडून व चाइल्ड लाइनच्या कार्यकर्त्यांकडून मिळालेल्या माहितीनुसार, राळेगण थेरपाळ येथे शेतमजुरीसाठी आलेल्या मूळच्या जुन्नर तालुक्यातील असणाऱ्या कुटुंबातील चार वर्षाच्या मुलीवर शेजारीच रहाणाऱ्या नारायण भाऊसाहेब खोसे (वय २७, रा. राळेगण थेरपाळ) याने संबंधित मुलीला घरात बोलवून बलात्कार केला. याबाबत मुलीच्या वडिलांनी चाइल्ड लाइनच्या मदतीने पारनेर पोलिसांत फिर्याद दिली. माहिती मिळाल्यानंतर गावातीलच काही प्रतिष्ठित नागरिकांनी ही घटना दाबल्याची चर्चा होत होती परंतु याबाबत चाइल्ड लाइन या संस्थेकडे तक्रार आल्याने या संस्थेच्या वतीने प्रवीण कदम व मीनाक्षी पवार या कार्यकर्त्यांनी मुलीच्या कुटुंबीयांची भेट घेऊन माहिती मिळविली व संस्थेच्या मदतीने मुलीच्या वडिलांनी रविवारी (२५ नोव्हेंबर) पारनेर पोलिसात फिर्याद दिली.
एक मुलगी बेपत्ता
तीन दिवसांपूर्वी राळेगण थेरपाळ येथून १२ वर्षाची दिव्या कारखिले ही मुलगी बेपत्ता झाली आहे. तिचा आद्यपही शोध लागला नसतानाच याच गावातील चार वर्षाच्या चिमुरडीवर अत्याचार झाल्याने राळेगण थेरपाळ गाव हादरले आहे. बेपत्ता झालेल्या मुलीचा शोध न लागल्याने आज (२६ नोव्हेंबर) ग्रामस्थांनी रास्ता रोको व गाव बंदचा इशारा दिला आहे.