‘जय श्रीराम’, ‘जय भवानी, जय शिवाजी’, असा जयघोष करत हजारो शिवसैनिक अयोध्येत पोहोचले असून, शिवसेना पक्षप्रमुख उद्धव ठाकरे हे सहकुटुंब आज सकाळी विशेष विमानानं अयोध्येसाठी रवाना झाले आहेत.
उद्धव आज आणि उद्या (२५ नोव्हेंबर) अयोध्या दौऱ्यावर जाणार आहेत. या दौऱ्यात ते लक्ष्मण किला भेट, शरयू नदीच्या तिरावर राम आरती, साधू-महंतांचे आशीर्वाद घेणार आहेत. मुंबईतून निघालेले हजारो शिवसैनिक अयोध्येत पोहोचले असून, आज सकाळी उद्धवही विशेष विमानानं सहकुटुंब अयोध्येकडे रवाना झाले. सकाळी साडेदहाच्या सुमारास ते ‘मातोश्री’ निवासस्थानाहून कुटुंबासमवेत मुंबई विमानतळाच्या दिशेने रवाना झाले. काही वेळानं ते मुंबई विमानतळावर पोहोचले. तेथून विशेष विमानाने ते अयोध्येला पोहोचतील.
शिवसेनेला राजकीय फायदा होईल: जोशी
तत्पूर्वी, माजी मुख्यमंत्री आणि शिवसेनेचे ज्येष्ठ नेते मनोहर जोशी यांनी उद्धव ठाकरेंची मातोश्रीवर जाऊन भेट घेतली. त्यांनी अयोध्या दौऱ्याविषयी उद्धव ठाकरेंशी चर्चा केली. उद्धव यांनी अयोध्येत जाण्याचा घेतलेला निर्णय हा योग्य असून, त्याचा पक्षाला राजकीय फायदा नक्कीच होईल, असा विश्वास जोशी यांनी व्यक्त केला.