पतीसोबत होणाऱ्या रोजच्या भांडणाला कंटाळून एका महिलेने पाच वर्षांच्या मुलाला कीटकनाशक पाजून आत्महत्या करण्याचा प्रयत्न केल्याची घटना मंगळवारी सांताक्रूझ येथे घडली. या घटनेत मुलाचा मृत्यू झाला, तर महिलेची प्रकृती गंभीर असून तिच्यावर कुपर रुग्णालयात उपचार सुरू आहेत.
सांताक्रूझच्या जुहू-तारा रोड येथील शिवाजीनगरमध्ये राजेश आयरे हा पत्नी रिना आणि मुलगा हर्ष यांच्यासह राहतो. रोजंदारीच्या पैशातून कुटुंबाचा उदरनिर्वाह चालविणाऱ्या राजेशकडे सोमवारी रात्री रिनाने खर्चासाठी पैसे मागितले. राजेशने पैसे देण्यास नकार दिल्याने दोघांमध्ये भांडण झाले. त्यानंतर रागाच्या भरात रिना घरातून निघाली आणि हर्षला सोबत घेऊन जुहु चौपाटी परिसरात आली. एका मेडिकलमधून खरेदी केलेले कीटकनाशक चौपाटीवर बसून ती स्वत: प्यायली. त्यानंतर तिने हर्ष यालाही कीटकनाशक पाजले. मात्र त्याची परिस्थिती पाहून ती हर्षला घेऊन कुपर रुग्णालयात गेली आणि तिथे सर्व प्रकार सांगितला. डॉक्टरांनी याबाबतची माहिती सांताक्रूझ पोलिसांना दिली. उपचारादरम्यान हर्षचा मृत्यू झाला, तर रिनावर उपचार सुरू आहेत. रिनाविरोधात हत्या आणि आत्महत्येचा प्रयत्न केल्याप्रकरणी सांताक्रूझ पोलिस ठाण्यात गुन्हा दाखल करण्यात आला आहे.