अभिनेत्री तनुश्री दत्ताने ज्येष्ठ अभिनेते नाना पाटेकर यांच्यावर गैरवर्तनाचा गंभीर आरोप केल्यानं मोठा वाद उफाळून आला आहे. या प्रकरणी आता नाना पाटेकर यांनी तनुश्री दत्ताविरोधात कायदेशीर कारवाई सुरू केली आहे. नानांनी तनुश्रीला नोटीस पाठवली आहे. नानांचे वकील राजेंद्र शिरोडकर यांनी त्यास दुजोरा दिला आहे.
तनुश्री दत्ताला कायदेशीर नोटीस देण्यात आली आहे. ही नोटीस तिला आज मिळेल. नाना पाटेकरांवरील आरोप नोटीसमधून फेटाळण्यात आलेत. तसंच त्यांची प्रतिमा मलिन केल्याने तनुश्री दत्ताने माफी मागावी, अशी मागणी नोटीसद्वारे केल्याचं वकील शिरोडकर यांनी सांगितलं.
याप्रकरणी फार काही बोलता येणार नाही. पण तनुश्री दत्ताने असे आरोप का केले याची काही कल्पना नाही. नाना पाटेकर लवकरच मुंबईत परतणार आहेत, असं शिरोडकर म्हणाले. मुंबईत आल्यानंतर नाना पाटेकर हे या प्रकरणी पत्रकार परिषद घेतील, अशी शक्यता आहे.