ज्येष्ठ नागरिकांना बेस्टच्या बस भाड्यात ५० टक्के सवलत देण्यात येणार आहे. ही सवलत देणे बेस्टला आर्थिकदृष्ट्या शक्य नसल्यामुळे मुंबई महापालिकेने अर्थसंकल्पांतर्गत तीन कोटी रुपयांचे अनुदान देण्याचा निर्णय घेतला आहे. त्यामुळे ६० वर्षे पूर्ण केलेल्या ज्येष्ठ नागरिकांना मोठा दिलासा मिळणार आहे. मात्र, हे ज्येष्ठ नागरिक मुंबईचे रहिवासी असणे बंधनकारक असून तसे पुरावे द्यावे लागणार आहेत.
महाराष्ट्र ज्येष्ठ नागरिक महासंघातर्फे गेल्या काही वर्षांपासून अशी मागणी केली जात होती. त्यामुळे पालिकेने आपल्या ज्येष्ठ नागरिक धोरणांतर्गत ही ५० टक्के सवलत देण्याचा निर्णय घेतला आहे. सवलतीसाठी काही निकष ठरवण्यात आले असून, ज्येष्ठ नागरिकांना अन्य कोणतीही सवलत लागू नसावी. कॅन्सर रुग्ण, कुष्ठरोगी, अंध, दिव्यांग, स्वातंत्र्यसैनिक, पत्रकार असल्यास एकावेळी एकच सवलत राहील, असे पालिकेने स्पष्ट केले आहे. ही योजना कायमस्वरूपी सुरू राहिल्यास ज्येष्ठ नागरिकांना आमरण या योजनेचा लाभ घेता येईल, असेही पालिका प्रशासनाकडून स्पष्ट करण्यात आले.
तांत्रिक अडचणीने योजना बारगळली?
ज्येष्ठ नागरिकांना बेस्ट प्रवासात ५० टक्के सवलतीची योजना प्रत्यक्षात न येण्यामागे तिकीट प्रणालीतील तांत्रिक अडचण कारणीभूत आहे. बेस्ट उपक्रमातील ट्रायमॅक्स तिकीट प्रणालीतील बरीचशी यंत्रे बिघडली आहेत. या यंत्रात सवलतीसंदर्भातील आवश्यक असणारे बदल करणे अपेक्षित आहे. परंतु, यंत्रांअभावी ते शक्य होत नसल्याचे सांगण्यात येते. बिघडलेल्या ट्रायमॅक्स यंत्रांऐवजी पूर्वीप्रमाणे टिकटिक पद्धतीने तिकीट दिले जाते. त्यात सवलतीचे तिकीट उपलब्ध नसल्याने ही योजना अद्याप कागदावर राहिली आहे.
ही कागदपत्रे आवश्यक
आधार कार्ड, रेशन कार्ड, मतदार ओळखपत्र, अधिवास प्रमाणपत्र, पासपोर्ट, ६० वर्षे पूर्ण केल्याचा जन्मतारखेचा पुरावा द्यावा लागणार आहे.