लोअर परळ ते प्रभादेवी स्थानकातील रेल्वे रुळांस खेटून असलेल्या खांब्यांना धडकून पाच महिन्यांत तब्बल १३ प्रवाशांना जीव गमवावा लागला आहे. अशा सर्वच अपघातप्रवण ठिकाणांबाबत रेल्वे प्रशासनासह रेल्वे सुरक्षा बलाच्या (आरपीएफ) नेमलेल्या संयुक्त समितीने अपघात कमी करण्यासाठी पाहणीनंतर अहवाल सादर केला आहे. त्यात, पुलाच्या पुनर्बांधणीसह रुळांलगत असलेले झाड बाजूला काढण्यासह अन्य शिफारसी केल्या आहेत.
पश्चिम रेल्वेवर स्थानक वा रेल्वे रुळांलगत असणाऱ्या धोकादायक खांब्यांमुळे प्रवाशांचा जीव धोक्यात येतो. ही संख्या पूर्वीच्या मानाने कमी झाली असली तरीही अद्याप त्याचा धोका पूर्णपणे कमी झालेला नाही.
वेगाने जाणाऱ्या लोकलमधील दरवाजात उभ्या राहणाऱ्या प्रवाशांना या खांब्यांचा अंदाज येत नसल्याने अपघात होतात. अशाप्रकारे १२ अपघातप्रवण ठिकाणांकडे संयुक्त समितीने लक्ष वेधले आहे. याप्रकारच्या १२ ठिकाणांमुळे १५६ अपघातांत ४१ प्रवासी मृत्युमुखी पडले आहेत. या समितीत रेल्वेच्या अधिकाऱ्यांपसह आरपीएफच्या अधिकाऱ्यांचा समावेश आह. या समितीने यापूर्वी केलेल्या पाहणीचा अहवाल पश्चिम रेल्वे प्रशासनास सादर केला आहे. पण हा अहवाल अद्याप स्वीकारण्यात आलेला नसल्याचेही स्पष्ट झाले आहे.
गेल्या पाच महिन्यांत लोअर परळ ते प्रभादेवीमधील पादचारी पुलाजवळील दोन धोकादायक खांबामुळे झालेल्या ३२ अपघातांत १३ प्रवाशांना जीव गमवावा लागला. रुळांच्या अतिशय जवळ असणाऱ्या खांबांमुळे हे अपघात झाले आहेत. खांबांचा धक्का लागून लोअर परळ स्थानकात १९ आणि प्रभादेवी स्थानकात १३ प्रवासी लोकलमधून रुळांवर पडले. त्यासाठी पादचारी पुलांची पुनर्बांधणी करून तिथे धोकादायक अंतर कमी करावे, अशी शिफारस केली आहे. सध्या या पुलाजवळ १० मीटर रुंदीच्या नवीन पादचारी पुलाचे काम हाती घेण्यात आले आहे. ते पूर्ण होताच जुन्या पुलाप्रमाणेच धोकादायक पूल पाडले जाणार असल्याचे यापूर्वीच पश्चिम रेल्वेने स्पष्ट केले होते.
बोरिवलीतील झाड धोकादायक
बोरिवली स्थानकात प्लॅटफॉर्म चार आणि पाचमधील झाडास धडकून ११ अपघात झाले आहेत. ते झाडदेखील या भागातून काढण्याची सूचना केली आहे. कांदिवली ते बोरिवली मार्गाजवळील अनधिकृत बांधकामे काढण्याचाही मुद्दा मांडला आहे.
रूळ ओलांडणाऱ्यांची समस्या जोगेश्वरी येथे सर्रास रूळ ओलांडले जात असल्याने अपघातास निमंत्रण मिळत आहे. अंधेरी ते जोगेश्वरी टप्प्यात १६ प्रवाशांचा रूळ ओलांडताना अपघाती मृत्यू झाला आहे.
स्थानक-अपघातांचे कारण-संख्या
लोअर परळ-प्रभादेवी – धोकादायक खांब-३२
दादर – चार आणि पाच येथे रूळ ओलांडताना-१४
सांताक्रूझ-खार-रूळ ओलांडताना – आठ
अंधेरी-आठ आणि नउ क्रमांकाच्या प्लॅटफॉर्मवरून रूळ ओलांडताना-१४
अंधेरी-जोगेश्वरी – रूळ ओलांडताना – १६
जोगेश्वरी-रूळ ओलांडताना-२२