डॉक्टर, इंजीनिअर, वकील होण्यासाठी विविध अभ्यासक्रम असतात हे आपल्याला माहीतच आहे. मात्र ‘आदर्श सून’ बनन्यासाठी काशी हिंदू विद्यापीठानं सुरू केलेला विशेष कोर्स सध्या चर्चेचा विषय ठरत आहे.
काशी हिंदू विद्यापीठाच्या आयआयटी विभागाकडून तीन महिन्यांचा कोर्स तयार करण्यात आला आहे. खासगी संस्था आणि ‘माझी मुलगी माझा अभिमान’ या अभियानांतर्गत तयार करण्यात आलेल्या कोर्समध्ये ‘आदर्श सून’ कसं व्हायचं ?याचे धडे देण्यात येणार आहेत. या विद्यापीठात नेहमीच्या अभ्यासाव्यतिरिक्त इतर कौशल्य विकास अभ्यासक्रमांचेही शिक्षण दिलं जातं. त्याचाच एक भाग म्हणून मुलींसाठी हा अभ्यासक्रम तयार करण्यात आलाय. आत्मविश्वास वाढवणं, समस्या सोडवताना तणावाची परिस्थिती कशी हाताळावी अशा गोष्टी इथं शिकल्या जाणार आहेत. शिवाय संगणक आणि फॅशनच्या संदर्भातील इतर विषय या अभ्यासक्रमाचा भाग असणार आहेत.
‘अभ्यासक्र सुरू करत असताना अनेक पालक आणि विद्यार्थिनींची मतं जाणून घेण्यात आली. बऱ्याच जणांनी या कोर्सचं स्वागत केलं असून लवकरच यासाठी निवड प्रक्रिया सुरू होणार आहे’,असं यंग स्किल्ड इंडियाचे सीईओ नीरज श्रीवास्तव यांनी सांगितलं आहे.