एखाद्या बँकेच्या इमारतीसमोर गाळा भाड्याने घेऊन उन्हाळ्याच्या मोसमात आंबेविक्रीचा व्यवसाय सुरू करायचा… दोन महिन्यांत बँकेच्या कामकाजाची तसेच इमारतीची बारकाईने पाहणी करून एक दिवशी दरोडा टाकायचा… एखाद्या चित्रपटाची पटकथा शोभावी, असा प्रकार सोलापुरात प्रत्यक्ष घडला. आधी पाहणी किंवा रेकी करून सोलापूर येथील भारतीय स्टेट बँकेंची स्ट्राँगरूम फोडण्याचा प्रयत्न करणाऱ्यांना चौघांना मुंबई पोलिसांच्या खंडणीविरोधी पथकाने नुकतीच अटक केली. त्यांच्यावर देशभरात अनेक गुन्हे असल्याचे उघड झाले आहे.
सोलापूर जिल्ह्यात टेंभूर्णी येथे भारतीय स्टेट बँकेची शाखा आहे. या शाखेची स्ट्राँगरूम ११ जुलै रोजी फोडण्याचा प्रयत्न झाला. सीसीटीव्ही फुटेजमध्ये आरोपींचे चेहरे समोर आल्यानंतर पोलिसांनी शोध सुरू केला. सोलापूर पोलिसांनी राज्यातील सर्व पोलिस ठाण्यांना याबाबत कळवले. या आरोपींचा शोध घेत असताना यापैकी एक जण मुंबईत मशीद बंदर येथे नारळविक्री करत असून इतरही आरोपी याच परिसरात रहात असल्याची माहिती खंडणीविरोधी पथकाला मिळाली. सोलापूर पोलिस आणि मुंबई पोलिसांच्या खंडणीविरोधी पथकाच्या अधिकाऱ्यांनी या ठिकाणी छापा टाकून अमरुद्दीन झहीर शेख, नाजीर शेख, साजन शेख, सौदागर शेख या चार जणांना अटक केली. अमरुद्दीन हा मजुरी करतो. नाजीर नारळविक्री करतो, तर साजन आणि सौदागर मच्छीविक्री करतात. अटक करण्यात आलेले हे चौघे मूळ झारखंडचे आहेत.
उन्हाळा सुरू झाला की देशभरातील एखादी बँक निवडून तिच्यासमोर चौघे आंबेविक्री करतात. बँकेत ये-जा करणे, बँकेतील कर्मचाऱ्यांना स्वस्तात आंबे देणे, जास्तीत जास्त वेळ बँकेत राहून आतील रचना आणि लॉकर यांचा अभ्यास केला जातो. आंब्याचा मोसम संपत आला की, बँकेत दरोडा टाकून पसार व्हायचे, अशी यांची गुन्हे करण्याची पद्धत असल्याचे पोलिसांनी सांगितले.