तामिळनाडूचे माजी मुख्यमंत्री आणि डीएमके प्रमुख एम करुणानिधी यांची प्रकृती शुक्रवारी रात्री पुन्हा बिघडली. त्यांना तातडीने चेन्नईतील कावेरी रुग्णालयात दाखल करण्यात आलं. त्यांच्यावर आयसीयूमध्ये उपचार सुरू आहेत.
करुणानिधी यांचा रक्तदाब कमी झाल्यानं डॉक्टरांच्या सल्ल्यानुसार त्यांना शुक्रवारी रात्री उशिरा कावेरी रुग्णालयात दाखल करण्यात आलं. त्यांची प्रकृती बिघडल्याचे समजताच, समर्थकांनी निवासस्थानाबाहेर मोठ्या संख्येने गर्दी केली. करुणानिधी यांचे पुत्र एम. के. अलगिरी, एम. के. स्टॅलिन, मुलगी कनिमोळी हे तातडीने रुग्णालयात गेले. ‘करुणानिधींची प्रकृती स्थिर आहे. कोणत्याही प्रकारच्या अफवांवर विश्वास ठेवू नका, असं आवाहन डीएमकेचे नेते ए. राजा यांनी समर्थकांना केलं. मध्यरात्रीच्या सुमारास डॉक्टरांनी मेडिकल बुलेटिन प्रसिद्ध केले. रक्तदाब कमी झाल्यानं त्यांची प्रकृती बिघडली, असे त्यात म्हटले आहे.