रूपेश साठे (वय २०, रा. सुतारदरा, कोथरूड) असे जखमी तरुणाचे नाव आहे. त्याच्यावर ससून रुग्णालयात उपचार सुरू आहेत. या प्रकरणी राजू अंकुश पाठारे (वय २४, रा. सुतारदरा) यांनी तक्रार दिली आहे. त्यानुसार समीर उर्फ बंटी अंकुश पासलकर (वय २०, रा.केळेवाडी), करण कैलास मोहोळ (वय १९, रा. काळूबाई गल्ली, सुतारदरा), अजय कैलास मापारे (वय १९, रा. सुतारदरा) आणि निलेश संतोष बोडके (वय १९, रा. केळेवाडी, कोथरूड) यांच्यावर गुन्हा दाखल करण्यात आला आहे.
पोलिसांनी दिलेल्या माहितीनुसार, राजू पाठारे व त्याचा मित्र रूपेश साठे हे दोघे रविवारी रात्री सुतारदरा येथे गप्पा मारत बसले होते. त्या वेळी अजय मापारेही त्या ठिकाणी थांबलेला होता. राजू व अजय मापारे हे एकमेकांना ओळखतात. त्यामुळे बोलताना राजू आणि रुपेश यांनी अजयची चेष्टामस्करी केली. त्याचा राग आल्याने तो तेथून निघून गेला. त्यानंतर राजू व रूपेश हे दोघे जण घरी निघाले. हे दोघे जण राजे शिवराय मित्र मंडळाच्या गणपती समोर आल्यानंतर अजय समीर उर्फ बंटी पासलकर, करण मोहोळ, नीलेश बोडके यांना घेऊन आला. अजयने त्यांना अडवून ‘लय मस्करी करता का,’ असा जाब विचारून बियरची बाटली रूपेशच्या डोक्यात मारली. त्यामुळे तो रक्ताच्या थारोळ्यात खाली पडला. त्यानंतर पासलकर याने त्याच्याजवळील पिस्तूल काढून पाठारे याच्या डोक्याला लावले. तसेच, त्याला जीवे मारण्याची धमकी दिली. राजू पाठारे याचे आई-वडिल आणि नातेवाइक भांडण सोडविण्यास आले. त्या वेळी पासलकर याने त्यांच्यावरही पिस्तूल रोखले आणि ठार मारण्याची धमकी दिली. या गोंधळामुळे तेथे गर्दी जमली. गर्दी जमलेली पाहून आरोपी तेथून पसार झाले. यानंतर दुसऱ्या दिवशी कोथरूड पोलिसांकडे तक्रार देण्यात आली. त्यानुसार पोलिसांनी शोध घेऊन चौघांना अटक केली. समीर उर्फ बंटी पासलकर हा पोलिसांच्या रेकॉर्डवरील आरोपी आहे. त्याच्यावर या आधी मारामारीचे दोन गुन्हे दाखल आहेत. या प्रकरणी सहायक निरीक्षक यू. एच. माळी हे अधिक तपास करीत आहेत.