नवी मुंबईतील कळंबोली येथील सेंट जोसेफ शाळेत इयत्ता पहिलीच्या विद्यार्थ्याला २५ वर्षीय शिक्षिकेनं वर्गासमोर पॅन्ट काढून उभा राहण्याची शिक्षा केल्याचा प्रकार समोर आला आहे. या प्रकरणात विद्यार्थ्याच्या पालकांनी पोलीस स्टेशनमध्ये तक्रार केल्यानंतर शिक्षिकेला अटक करण्यात आली आहे.
पहिलीत शिकणाऱ्या या विद्यार्थ्यानं वर्गात शिट्टी मारली आणि मस्ती केली म्हणून शिक्षिकेनं त्याला शिक्षा म्हणून भर वर्गात पॅन्ट काढून उभं केलं. यानंतर इतर विद्यार्थ्यांनी त्याला चिडवण्यास सुरुवात केली. या प्रकारामुळं घाबरलेल्या विद्यार्थ्यानं वर्गात घडलेला हा सर्व प्रकार आपल्या पालकांना सांगितला. विद्यार्थ्यांच्या पालकांना हा प्रकार लज्जास्पद वाटल्यानं त्यांनी व्यवस्थानाकडं तक्रार केली. मात्र, शाळेकडून या प्रकरणाची दखल घेतली न गेल्यानं पालकांनी या विरोधात कळंबोली पोलिस स्टेशनमध्ये तक्रार केल्यानंतर पोलिसांनी संबंधित शिक्षिकेला अटक केली आहे.
या प्रकरणी प्रतिक्रिया घेण्यासाठी मुख्याध्यापिका रंजना चाफले संपर्क साधला असता ‘ या प्रकाराची चौकशी करण्यात येईल, त्यानंरच योग्य ती कारवाई करू तसंच पोलिसांना देखील तपास कार्यात पूर्ण मदत करण्यात येईल’ असं त्यांनी स्पष्ट केलं आहे.