समलिंगी संबंधांना गुन्हा ठरविणाऱ्या भारतीय दंड संहितेतील कलम३७७ वरील निर्णय सर्वोच्च न्यायालयानं राखून ठेवला असताना अनैसर्गिक शरीरसंबंधांविषयीचं एक प्रकरण कोर्टात आलं आहे. ‘ओरल सेक्स’ साठी बळजबरी केल्याबद्दल एका महिलेनं तिच्या पतीविरोधात कोर्टात धाव घेतली असून पतीविरोधात कलम ३७७ अंतर्गत अनैसर्गिक सेक्सचा गुन्हा दाखल करावा, अशी मागणी केली आहे.
न्यायमूर्ती एन. व्ही. रामना आणि एम. एम. शांतनागौदर यांच्या खंडपीठापुढं यावर सुनावणी झाली. ‘पीडित महिलेचा पती तिला बळजबरीनं ओरल सेक्स करण्यास भाग पाडतो. हा अनैसर्गिक सेक्सचाच प्रकार आहे, असा युक्तिवाद पीडित महिलेच्या वकील अपर्णा भट यांनी न्यायालयात केला. न्यायालयानं पीडित महिलेच्या पतीला नोटीस बजावली आहे.
पीडित महिला अवघ्या १५ वर्षांची असताना २००२ साली तिचा साखरपुडा झाला होता. त्यानंतर २०१४ साली तिचं लग्न झालं. डॉक्टर असलेला तिचा पती तिच्या इच्छेविरोधात वारंवार ‘ओरल सेक्स’ करण्यास भाग पाडतो, असा तिचा आरोप आहे. या प्रकरणी तिनं पतीवर बलात्कार आणि अनैसर्गिक सेक्सचा आरोप करत तक्रार दाखल केली होती. वैवाहिक बलात्कारासंबंधी कलम ३७५ अंतर्गत कसलीही तरतूद नसल्याचं गुजरात हायकोर्टानं स्पष्ट केलं होतं. तसंच, कलम ३७७ अंतर्गत महिलेने केलेले आरोपही फेटाळून लावले होते. त्यानंतर तिनं सर्वोच्च न्यायालयात धाव घेतली आहे.