खुल्या बाजारातील तूरडाळीचे दर लक्षात घेऊन, राज्य सरकारने रेशन दुकानांवरील तूरडाळ २० रुपये प्रति किलो दराने स्वस्त करण्याचा निर्णय घेतला आहे. त्यामुळे रेशन दुकानांवर आता ५५ ऐवजी ३५ रुपये किलो दराने डाळ खरेदी करण्याची संधी रेशनकार्डधारकांना मिळणार आहे. महागाईच्या जमान्यात रेशनवरील तूरडाळ स्वस्त झाल्यामुळे सामान्य व मध्यमवर्गीय कुटुंबाना दिलासा मिळणार आहे.
राज्यातील तूर उत्पादक शेतकऱ्यांचे आर्थिक हित सांभाळतानाच, ग्राहकांना चांगल्या दर्जाची, उत्तम पोषणतत्त्वे असलेली तूरडाळ रास्त दरात उपलब्ध करून देण्याचा निर्णय अन्न व नागरी पुरवठा विभागाने घेतला आहे. मुंबई ठाणे शिधावाटप क्षेत्रातील रेशनधारक कुटुंबांनी याचा लाभ घ्यावा, असे आवाहन शिधावाटप नियंत्रक व नागरी पुरवठा विभागाच्या संचालकांनी केले आहे. अन्नदाता शेतकरी ते शेवटचा ग्राहक असलेल्या ग्राहकांना या निर्णयामुळे फायदा होणार आहे.
दोन वर्षांपूर्वी राज्यात तुरीचे विक्रमी पीक आले होते. परिणामी तुरीच्या भावात घसरण होऊन तूर उत्पादक शेतकऱ्यांचे मोठे आर्थिक नुकसान होण्याची शक्यता निर्माण झाली होती. तथापि, केंद्र व राज्य सरकारने आधारभूत खरेदी योजनेतंर्गत खरीप हंगाम २०१६-१७ मध्ये शेतकऱ्यांकडून हमी भावाने खरेदी केलेल्या तुरीची भरडाई करून, प्राप्त झालेल्या तूर डाळीची रेशनिंग व्यवस्थेतील रास्त भाव दुकानातून तूर डाळ विक्रीचा निर्णय यापूर्वीच राज्य सरकारने घेतला होता.
तूरडाळ विक्रीसंदर्भात संबंधित शासन निर्णयानुसार अधिकृत शिधावाटप दुकानातून तूरडाळ ५५ रु. प्रति किलो दराने उपलब्ध करून देण्यात आली होती. तूरडाळीचे सध्याचे बाजारातील दर लक्षात घेऊन तूर डाळ विक्री दरामध्ये २० रुपयांनी घट करून आता तूरडाळ ३५ रु. प्रति किलो विक्री दराने रेशनिंगवर उपलब्ध करून देण्यात आली आहे.
मुंबई-ठाणे शिधावाटप क्षेत्रात प्रति किलो ३५ या दराने एक किलोच्या पाकिटामध्ये सर्व अधिकृत रेशन दुकानातून तूरडाळ सर्व प्रकारच्या शिधापत्रिकाधारकांना व इतर सामान्य नागरिकांना मुबलक प्रमाणात उपलब्ध करुन देण्यात आली आहे. डाळीचा दर्जा, त्यामधील पोषकतत्वे व किंमत या बाबींचा विचार करुन व सामान्य कार्डधारकांचे व जनतेचे हित लक्षात हा निर्णय सरकारने घेतला आहे. त्याचा जास्तीत जास्त रेशनकार्डधारकांनी लाभ घ्यावा, असे आवाहन शिधावाटप नियंत्रकांनी तसेच नागरी पुरवठा विभागाच्या संचालकांनी केले आहे.