छत्तीसगडमध्ये जशपूर जिल्ह्यात एका गावात ३ मुलींवर बलात्कार करणाऱ्या आरोपींना ३०,००० रुपये दंड ठोठवून नंतर त्याच पैशाने संपूर्ण गावाला मटण पार्टी देण्याची अजब शिक्षा सुनावण्यात आली. या शिक्षेमुळे पीडित मुलींचे कुटुंबींय संतप्त झाले असून त्यांनी न्यायाची मागणी केली आहे.
५ जुलैला संध्याकाळी तीन मुली नेहमीच्या वेळेस घरी आल्या नाही. त्यावेळी गावातल्या एका युवकाने शोध घेतला असता आरोपी त्या तिघींवर बलात्कार करताना आढळले. युवकाने विरोध करताच आरोपींनी तिथून पळ काढला. नंतर हे प्रकरण गावाच्या पंचायतीसमोर ठेवण्यात आलं. तेव्हा आरोपींचे गुन्हे निश्चित करत पंचायतीने त्यांना ३०,००० रुपये दंड ठोठवला. दंडातील रकमेपैकी ४८५ रुपये गावातील प्रत्येक कुटुंबाला द्यायला सांगितले. तर उरलेल्या रकमेने गावातल्या ४५ कुटुंबांना मटण पार्टी देण्याची शिक्षा दिली.
ही अजब शिक्षा न पटल्यामुळे पीडित मुलींच्या कुटुंबीयांनी पोलिसात जायचा पवित्रा घेतला. तेव्हा पोलिसांकडे न जाण्याची सक्तीच ग्राम पंचायतीने त्यांना केली. कंटाळलेल्या कुटुंबीयांनी स्थानिक माध्यमांच्या वार्ताहरांना हा सगळा प्रकार सांगितला. पत्रकारांनी याची माहिती पोलिसांना दिल्यानंतर पोलिसांच्या पथकाने गावात जाऊन तपासास दरम्यान गावाच्या सरपंचाने बलात्कार झालाच नसल्याची माहिती दिली आहे. आरोपींसोबतच्या शारीरिक संबंधांना मुलींची सहमती असल्याचा दावा त्यांनी केला आहे.