अभिनेता मिथुन चक्रवर्ती यांची पत्नी योगिता बाली व मुलगा महाक्षय उर्फ मिमोह यांना बलात्काराच्या प्रकरणात अटकेपासून संरक्षण देण्यास मुंबई उच्च न्यायालयाने गुरुवारी स्पष्ट नकार दिला.
‘मिमोहने लग्न करण्याचे वचन देऊन माझ्याशी चार वर्षे शारीरिक संबंध ठेवले. मात्र नंतर फसवणूक करून माझ्यावर बलात्कार केला. यातून मी गर्भवती राहिल्यानंतर मिमोहने काहीतरी औषधे दिली आणि त्यातून माझा गर्भपात झाला. त्यानंतर मिमोहच्या आईने मला धमकावले. त्यामुळे जीवाच्या भीतीने मी मुंबईहून दिल्लीत आले’, अशी तक्रार एका महिलेने दिल्लीतील न्यायालयात केली होती. त्यावर ‘एफआयआर करण्याइतपत तथ्य दिसत आहे’, असे नमूद करत दिल्ली न्यायालयाने पोलिसांना कायदेशीर कार्यवाही करण्याचे निर्देश दिले होते. त्यामुळे अटक होण्याच्या भीतीने मिमोह व योगिता यांनी मुंबई उच्च न्यायालयात अटकपूर्व अर्ज केला होता. त्याविषयी सुनावणी घेतल्यानंतर अर्जदार हे दिल्लीतील संबंधित न्यायालयात अर्ज करू शकतात, असे नमूद करून न्या. अजय गडकरी यांनी त्यांचा अर्ज फेटाळून लावला.