मृतांत्म्यासोबत बोलायची सवय आहे आणि मृतात्म्याने हे बाळ तुझ्या आयुष्याची राखरांगोळी करेल असे सांगत असल्याने आरोपी वकील पत्नीस वारंवार गर्भपात करण्यास सांगत होता. मात्र, पत्नीचा यास विरोध असल्याने वकिलाने बेदम मारहाण केली. अशा तर्कशून्य बतावण्या करणाऱ्या मुंबईतील एका वकिलाला कुलाबा पोलिसांनी बेड्या ठोकल्या आहेत.
गरोदर पत्नीला मारहाण केल्याप्रकरणी आणि या मारहाणीत पोटातील बाळ दगावल्याने सत्र न्यायालयात प्रॅक्टिस करणाऱ्या वकिलाला अटक केली आहे. ११ आठवड्यांच्या गरोदर पत्नीला बाळाला जन्म देऊ नये म्हणून या अटक वकिलाने दमदाटी करत बेदम मारहाण केली. कारण ३० वर्षीय पेशाने वकील असलेला पतीला मृतात्म्यांसोबत बोलायची सवय आहे आणि मृतात्म्याने त्याला या बाळास पत्नीने जन्म दिला तर ते बाळ तुझ्या आयुष्याची राखरांगोळी करेल असे सांगत असल्याने आरोपी वकील पत्नीस वारंवार गर्भपात करण्यास सांगत होता. असे तक्रारदार पीडित महिलेने कुलाबा पोलिसांना दिलेल्या जबाबात म्हटले आहे. तक्रारदार महिलेचा मात्र पतीच्या अशा वागण्याला विरोध असल्याने वकिलाने बेदम मारहाण केली. वकील आरोपीने केलेल्या या अजब दाव्यामुळे पोलिसांनी देखील आश्चर्य व्यक्त केले आहे.
पत्नीच्या तक्रारीनंतर गरोदर पत्नीला मारहाण करणाऱ्या निर्दयी वकिलाला कुलाबा पोलिसांनी अटक केली आहे. मारहाणीमुळे या महिलेचा गर्भपात झाला असून तिने तिच्या पतीविरोधात कुलाबा पोलीस ठाण्यात तक्रार नोंदविली आहे. कुलाबा पोलिसांनी भा. दं. वि. कलम ३१५, ३२४, ५०४ आणि ५०६ अन्वये वकिलाविरोधात गुन्हा दाखल केला आहे. पीडित पत्नीच्या तक्रारीनुसार तिच्य पतीला मृतात्म्यांशी बोलण्याची सवय आहे व त्या आत्म्यांच्या सांगण्यावरूनच तो तिला गर्भपात करण्यासाठी जबरदस्ती करत होता. मात्र, तिने गर्भपातास नकार दिल्यानंतर त्याने तिला मारहाण करून तिचा गर्भपात घडवून आणला.