महाराष्ट्र राज्य महिला आयोगाकडून राज्यातील विविध महिला कारागृहात असणाऱ्या महिला कैद्यांसाठी सॅनिटरी पॅड व्हेंडिंग मशिन तसेच वापर झालेले पॅड नष्ट करण्याकरिता बर्निंग मशिन देण्यात आले आहेत. कारागृहात असणाऱ्या महिलांना सुविधा मिळाव्यात यासाठी हे पाऊल उचलल्याचे राज्य महिला आयोगाच्या अध्यक्ष विजया रहाटकर यांनी सांगितले.
महाराष्ट्र राज्य महिला आयोगाकडून राज्यातील कारागृहात असलेल्या महिला कैद्यांना पुरविण्यात येणाऱ्या सोयीसुविधासंदर्भात आवश्यक त्या उपाययोजना सुचविण्यासाठी नेमलेल्या विशेष तपास पथकचा अहवाल राज्य सरकारला सादर करण्यात आला होता. त्या अनुषंगाने महिला कैद्यांना सुविधा मिळावी यासाठी आयोगाकडून राज्यातील नऊ महिला कारागृहात सॅनिटरी पॅड व्हेंडिंग मशिन आणि वापर झालेले पॅड नष्ट करण्याकरिता बर्निंग मशिन देण्यात आले आहे.
या व्हेंडिंग मशिनसोबत पन्नास सॅनिटरी नॅपकिनच्या पाकिटांचे वाटपही आयोगामार्फत करण्यात आले आहे. या व्हेंडिंग आणि बर्निंग मशिनची सुरक्षा व देखभाल करणे, वेळोवेळी मशिनमध्ये सॅनिटरी पॅड ठेवण्यासाठी संबधित संस्थेशी संपर्क साधण्याची जबाबदारी कारागृह प्रशासनाकडे देण्यात आली आहे. हे सॅनिटरी पॅड मोफत वा अत्यल्प दरामध्ये देण्यासंदर्भातील निर्णय त्या तुरुंग प्रशासनाचा असणार आहे.