वरळी येथील ग्रीन लॉन्स शाळेतून सुमारे ११ विद्यार्थ्यांना घेऊन निघालेल्या स्कूल व्हॅनला एलफिन्स्टन येथे अचानक आग लागली. त्या परिसरातील वाहतूक पोलिस योगेश शिंदे यांच्या सर्तकतेमुळे व्हॅनमधील मुलांचा जीव वाचला.
दुपारी शाळा सुटल्यानंतर रवी विनेरकर हे त्यांच्या स्कूल व्हॅनमध्ये ११ विद्यार्थ्यांना बसवून घरी सोडण्यास निघाले. काही विद्यार्थ्यांना सोडल्यानंतर त्यांनी दुपारी अडीच वाजण्याच्या सुमारास एलफिन्स्टन स्टेशनजवळील पार्श्वनाथ इमारतीजवळ एका विद्यार्थ्याला उतरवले. त्यावेळेस तेथे वाहतूक नियंत्रणासाठी उभे असलेले वाहतूक पोलिस योगेश शिंदे यांना त्या व्हॅनला आग लागल्याचे दिसले. त्यांनी ताबडतोब विनेरकर यांना सूचना दिली. यानंतर शिंदे आणि विनेकर यांनी काही क्षणात व्हॅनमधील सहा मुलांना खाली उतरवले व त्यांचा जीव वाचवला. ही आग का लागली याचे कारण अद्याप कळू शकले नाही. या आगीच्या घटनेनंतर स्कूल व्हॅनच्या सुरक्षेचा प्रश्न पुन्हा एकदा ऐरणीवर आला आहे.