हे जग आम्हाला एकत्र येऊ देणार नाही’ असं म्हणत अहमदाबादमधील एका समलिंगी जोडप्याने साबरमती नदीत उडी घेत आत्महत्या केल्याची धक्कादायक घटना घडलीय. आत्महत्येपूर्वी या जोडप्यातील एका महिलेने तिच्या तीन वर्षांच्या मुलीलाही नदीत फेकले.
आशा ठाकोर आणि भावना ठाकोर अशी या महिलांची नावं असून त्या राजोदा गावातील एका खासगी कंपनीत नोकरीला होत्या. दोघीही विवाहित असून त्यापैकी एकीला तीन वर्षांची मुलगीदेखील होती. लग्नानंतर दोघी एकमेकांच्या प्रेमात पडल्या परंतु, या समलैंगिक संबंधांमुळे त्यांच्या कुटुंबीयांकडून दोघींना मानसिक त्रास होऊ लागला. या त्रासाला कंटाळून दोघींनी आपले जीवन संपवल्याची माहिती पोलिसांनी दिली आहे.
‘आमचे एकमेकींवर प्रेम असूनही हे जग आम्हाला एकत्र सुखाने जगू देत नाही. आम्हाला आनंदाने राहता यावे यासाठी आम्ही जगापासून दूरही गेलो होतो परंतु, आम्हाला कोणीच जगू देत नाही’ असं त्यांनी आत्महत्येपूर्वी लिहून ठेवले. या दोन्ही महिलांनी आधी तीन वर्षाच्या मुलीला साबरमती नदीत फेकले. त्यानंतर दोघींनी एका ओढणीने एकमेकींना घट्ट बांधून घेतले आणि नदीत उडी मारत जीव संपवला.