पश्चिम, हार्बर रेल्वेवर देखभाल, दुरुस्तीसाठी आणि मध्य रेल्वेवर परळ टर्मिनसकडील नवीन प्लॅटफॉर्मच्या कामासाठी रविवार, १० जूनला ब्लॉक घेतला जाणार आहे. मध्य रेल्वेवर परळ स्थानकातील नवीन प्लॅटफॉर्मसाठी सकाळी ९.३० ते सायं. ५.३० पर्यंत ब्लॉक घेतला जाईल. या कालावधीत सीएसएमटीहून जाणाऱ्या धीम्या लोकल स. ९.०५ ते सायं. ५.२४ वेळेत भायखळा ते माटुंगा स्थानकामध्ये जलद मार्गावर चालवण्यात येतील. या लोकल चिंचपोकळी, करी रोड स्थानकावर थांबणार नाही.
सीएसएमटीहून सुटणाऱ्या सर्व जलद/सेमी फास्ट लोकल स. ९.२९ ते सायं. ४.४५ कालावधीत कुर्ला, घाटकोपर, विक्रोळी, भांडुप, मुलुंड, दिवा स्थानकात थांबतील. कल्याण-ठाण्याहून सुटणाऱ्या जलद/सेमी फास्ट लोकल स. ९.०७/स. ९.३० ते दु. ४.०२ कालावधीत दिवा, मुलुंड, भांडुप, विक्रोळी, घाटकोपर, कुर्ला स्थानकातही थांबतील.
हार्बर मार्गावर सीएसएमटी ते चुनाभट्टी/वांद्रे मार्गावर स. ११.४० ते दु. ४.४० आणि चुनाभट्टी ते वांद्रे-सीएसएमटी मार्गावर ब्लॉक घेण्यात आला आहे. सीएसएमटी ते वाशी/बेलापूर/पनवेल मार्गावर स. ११.३४ ते दु. ४.४७ आणि सीएसएमटी ते वांद्रे/अंधेरी/गोरेगाव मार्गावर स. ९.५६ ते दु. ४.४३ पर्यंत सेवा खंडीत राहील. पनवेल/बेलापूर/वाशी ते सीएसएमटी मार्गावर स. ९.५३ ते दु. ३.२० पर्यंत आणि वांद्रे/अंधेरी/गोरेगाव ते सीएसएमटी सेवा स. १०.४५ ते दु. ४.५८ पर्यंत खंडीत राहील. प्रवाशांच्या सुविधेसाठी कुर्ला प्लॅटफॉर्म क्रमांक आठवरून पनवेलसाठी जादा गाड्या सोडल्या जातील.