पत्नीला जबरदस्ती दारू पाजणे आणि तिच्या समोरच परस्त्रीशी संबंध ठेवणं हे क्रौर्यच आहे, असा महत्त्वपूर्ण निर्णय दिल्ली उच्च न्यायालयाने दिला आहे.
एका महिलेने साकेत कोर्टात याचिका दाखल करून घटस्फोट देण्याची मागणी केली होती. तिच्याशी तिचा पती क्रूर वागल्याचा आरोप या महिलेने केला होता. त्यावर न्यायालयाने हा महत्त्वपूर्ण निर्णय दिला. याप्रकरणात संबंधित महिलेने दिलेल्या जबाबावर शंका उपस्थित करता येणार नाही. पतीच्या वागणुकीबाबत महिलेने दिलेली कबुली खरी आहे, असं न्यायालयाने स्पष्ट केलं.
या महिलेच्या पतीने त्याचा भाऊ आणि नातेवाईकांच्या मदतीने तिचा लैंगिक छळ करण्याचा प्रयत्न केला. तिच्या पतीने तिला जबरदस्ती दारू पाजली आणि तिच्या समोरच दुसऱ्या महिलेशी संबंध ठेवला. या जबाबवर संबंधित महिला कायम राहिली. त्यामुळे कनिष्ठ न्यायालयाने हा प्रकार गंभीर क्रौर्य असल्याचं स्पष्ट केलं आहे, असं सांगत न्यायालयाने या महिलेच्या घटस्फोटाचा हुकूमनामा मंजूर केला.