शहरातील बेकायदा हातभट्टीच्या तीन दारूअड्ड्यांवर जामखेड पोलिसांनी कारवाई करून ७० हजारांचे दारू तयार करण्याचे रसायन व हातभट्टी दारू नष्ट केली. अनेक वर्षांनंतर जामखेड पोलिस स्टेशनचे पोलिस निरीक्षक पांडुरंग पवार यांनी ही कारवाई केली असल्याने नागरिकांमध्ये समाधान व्यक्त केले जात आहे. या प्रकरणी महिलांसह तीन जणांवर गुन्हा दाखल करण्यात आला आहे.
पोलिसांकडून मिळालेली माहिती अशी, शहरातील कुंभारतळ येथे बेकायदा हातभट्टी दारू तयार केली जात असल्याची माहिती नवीनच आलेले जामखेड पोलिस स्टेशनचे पोलिस निरीक्षक पांडुरंग पवार यांना मिळाली होती. त्यानुसार बुधवारी (१६ मे) पहाटे जामखेड पोलिसांचे पथक कुंभारतळे या ठिकाणी गेले. या वेळी त्यांनी त्या ठिकाणी आढळून आलेले ७ हजार रुपये किमतीच्या दोन वेगवेगळ्या प्लास्टिक ड्रममध्ये ठेवण्यात आलेली साठ हजार रुपयांची ७० लिटर हातभट्टी दारू व तयार करण्याच्या रसायनाचे ७ बॅलर अशी एकूण पंधराशे लिटर दारू तयार करण्याचे रसायन ड्रम तोडून सर्व साहित्य नष्ट केले. या प्रकरणी पोलिस कॉन्स्टेबल विजय कोळी यांनी दिलेल्या फिर्यादीवरून आरोपी सावित्रीबाई धनसिंग पवार (वय ५०, रा. कुंभारतळे) हिच्याविरोधात गुन्हा दाखल करण्यात आला आहे. तसेच जवळच दुसऱ्या ठिकाणी पोलिसांनी हातभट्टी विक्री करत असलेल्या ठिकाणी धाड टाकून १ हजार ७५० रुपये किमतीची हातभट्टी दारू असलेले दोन प्लास्टिक ड्रम आढळून आले. तो दारूसाठा पोलिसांनी नष्ट केला. या प्रकरणी पोलिस कॉन्स्टेबल गणेश साने यांनी दिलेल्या फिर्यादीवरून आरोपी अश्विनी अनिल पवार (वय ३०, रा. कुंभारतळे, जामखेड) हिच्याविरोधात गुन्हा दाखल करण्यात आला आहे. तिसऱ्या घटनेत बस स्थानकाच्या मागील बाजूस पाच हजार रुपये पन्नास लीटर गावठी हातभट्टी दारूविक्री करताना आढळून आली. हीदेखील दारू पोलिसांनी जागेवरच नष्ट केली. या प्रकरणी पोलिस कॉन्स्टेबल मुक्तार अब्दुल हमीद कुरेशी यांनी दिलेल्या फिर्यादीवरून आरोपी रामदास आत्माराम शिंदे याच्याविरोधात जामखेड पोलिस स्टेशनला गुन्हा दाखल करण्यात आला आहे. अशी एकूण विविध ठिकाणी ७० हजारांची दारू व दारू बनविण्याचे रसायन नष्ट केले. जामखेड पोलिस स्टेशनचे पोलिस निरीक्षक पांडुरंग पवार, हेड कॉन्स्टेबल बापू गव्हाणे, शबनम शेख, पोलिस नाईक नितीन शेळके, अजिनाथ बडे, पोलिस कॉन्स्टेबल विजय कोळी, गणेश साने यांच्या पथकाने ही कारवाई केली आहे.