अनेक वर्षांनंतर आपला नेता येणार, आपल्याशी संवाद साधणार, या भावनेने आनंदात असलेल्या पनवेलच्या मनसैनिकांची गुरुवारी निराशा झाली. मात्र अवघी २० मिनिटे पदाधिकाऱ्यांशी झालेला एकतर्फी संवाद यापलीकडे काहीच न करता राज ठाकरे पनवेलमध्ये केवळ सव्वा तासाचा दौरा आटपून निघून गेले.
महाराष्ट्र नवनिर्माण सेनेचे प्रमुख राज ठाकरे येणार म्हणून पनवेलच्या गटातटांत विभागलेल्या, कसाबसा तग धरलेल्या मनसेत नवीन ऊर्जा येईल, अशी अपेक्षा गेल्या काही दिवसांपासून होती. राज ठाकरे पनवेलमध्ये मुक्काम करणार असल्यामुळे पदाधिकाऱ्यांचे म्हणणे ऐकून घेतील, मार्गदर्शन करतील अशी अपेक्षा होती. राज ठाकरे रात्री उशिरा पनवेलच्या गार्डन हॉटेलमध्ये आले, त्यामुळे बुधवारी रात्री कार्यकर्त्यांशी काही संवाद झाला नाही. सकाळी खऱ्या अर्थाने दौऱ्याला सुरुवात झाली. साडेनऊ वाजता पत्रकारांशी बोलल्यानंतर हॉटेलमध्ये नियोजित पद्धतीने त्यांनी सामाजिक संघटनांशी संवाद साधला. सिटिझन्स युनिटी फोरम, पनवेल संघर्ष समिती, आपला आधार आणि महिला रिक्षाचालकांचा यात समावेश होता. २० मिनिटांच्या चर्चेनंतर त्यांच्याशी गाठभेट झाल्यानंतर तिथून त्यांनी ज्येष्ठ नागरिक संघाच्या सभागृहात पदाधिकाऱ्यांशी संवाद साधण्यासाठी प्रस्थान केले. कार्यडियाक अॅम्बुलन्सचे उद्घाटन केल्यानंतर ते सभागृहात गेले, पनवेल तालुक्यातील ठराविक ४० कार्यकर्त्यांचा यामध्ये सहभाग होता. पदाधिकाऱ्यांना गटतट विसरा, एकत्र या, लोकांपर्यंत पोहोचा, एकत्र भेटत जा, एकत्र जेवत जा, विरोधकांना साहेब साहेब करू नका, असा सल्ला त्यांनी दिला. प्रत्येक कार्यकर्त्याला ओळख करून द्यायला सांगितली. पद आणि नाव सांगून ओळख झाली. मात्र मोजक्या नेहमीच्या गोष्टी सांगण्यापलीकडे काही विशेष मार्गदर्शन किंवा अडचणी न विचारता अवघ्या २५ मिनिटांत पदाधिकाऱ्यांशी संवादही संपला. तोपर्यंत ११ वाजून पाच मिनिटे झाली होती. एकूण सव्वा दोन तासांच्या कालावधीत पत्रकारांशी आणि सामाजिक संस्थांशी झालेला संवाद वगळल्यास कार्यकर्त्यांशी संवाद साधण्यासाठी केवळ २५ मिनिटे वेळ देण्यात आल्याने पक्षप्रमुखांशी झालेल्या भेटीनंतर कार्यकर्त्यांच्या चेहऱ्यावर कोणताही उत्साह पहायला मिळाला नाही. एकूण राज ठाकरेंचा पनवेल दौरा अवघ्या सव्वा तासात संपवून राज ठाकरे उरणच्या दिशेने निघून गेले. एकंदरित दौऱ्यातून काही साध्य झाले नाही, अशी उघड चर्चा कार्यकर्ते कार्यक्रम संपताच सुरू होती.