कठुआ, उन्नाव, सुरत आणि इंदूरमधील बलात्काराच्या घटनांनी देशभरात संतापाची लाट उसळली असताना दिल्लीतही नराधमांनी एका अल्पवयीन मुलीला वासनेचे शिकार बनवले आहे. अकरावीत शिकत असलेल्या या विद्यार्थिनीवर तीन जणांनी धावत्या कारमध्ये बलात्कार केला आणि तब्बल ११ तासांनंतर तिला निर्जनस्थळी रस्त्यावर फेकून हे तिघे पसार झाले. दरम्यान, याप्रकरणी पोक्सो कायद्यांतर्गत गुन्हा दाखल करण्यात आला असून अद्याप कुणालाही अटक करण्यात आलेली नाही.
१८ एप्रिलची ही घटना असून तीन दिवस हे प्रकरण पोलिसांनी दाबून ठेवले, असा आरोप होत आहे.
१८ एप्रिल रोजी दुपारी २.३० च्या सुमारास कॉलेज सुटल्यानंतर पीडित मुलीला कॉलेजची बस चुकली. त्यामुळे ती वर्गमैत्रिणीसह चालत निघाली होती. दरम्यान, तिचा दूरचा नातेवाईक नवीन, क्लासमेट अंकित आणि अन्य एक युवक असे तिघेजण कारमधून तिथे आले. घरी सोडण्याच्या नावाखाली त्यांनी तिला कारमध्ये बसवले. त्यानंतर कारमध्ये तोंड बांधून ठेवत तिच्यावर तिघांनीही बलात्कार केला. तब्बल ११ तास ही कार नोएडातील रस्त्यांवरून फिरत होती. दरम्यान, रात्री दीडच्या सुमारास नॉलेज पार्कजवळील गलगोटिया कॉलेजजवळ निर्जन रस्त्यावर तिला फेकून तिघेही पसार झाले.
दरम्यान, दुपारी तीन वाजेपर्यंत मुलगी घरी न आल्याने आई-वडिलांनी ग्रेटर नोएडा पोलीस ठाण्यात मुलगी बेपत्ता झाल्याची तक्रार दाखल केली होती. त्यानंतर पोलीस तिचा शोध घेत होते. रात्री २ च्या सुमारास गलगोटिया कॉलजेजवळ पोलिसांना ती आढळली.