शनिवारी नाशिक शहरात पेट्रोलसाठी ८२ रुपये ३० पैसे प्रतिलिटर दर नोंदविला गेला. आंतरराष्ट्रीय बाजारपेठेत झालेल्या इंधन दरवाढीमुळे पेट्रोल आणि डिझेलच्या दरांनी उच्चांक गाठला आहे. गत पंधरवड्यापासून शहरात हे दर कमी होण्याची चिन्हे नाहीत. काही दिवसांच्या तुलनेत शहरात सुमारे पाच ते सात रुपयांची दरवाढ झाल्याचे गेल्या काही दिवसांच्या पेट्रोलदराच्या आकडेवारीवरून दिसून येते.
पेट्रोल दरवाढीसंदर्भात अधिक माहितीसाठी फेडरेशन ऑफ ऑल महाराष्ट्र पेट्रोल डीलरचे सदस्य नितीन धात्रक यांच्याशी संपर्क साधला असता ते म्हणाले, “आंतरराष्ट्रीय बाजारपेठेत होणाऱ्या इंधन दरवाढीमुळे स्थानिक ठिकाणीही या किमतींमध्ये भर पडते आहे. नाशिकमध्ये तीन महिन्यांपासून ‘डीपीसी’ म्हणजे डेली प्राइज चेंज या नियमाची अंमलबजावणी पेट्रोलपंपांकडून होत आहे. यानुसार रोज बदलते दर जाहीर केले जाऊन त्यानुसार आकारणी करण्यात येते.” दुसरीकडे पेट्रोलच्या या उच्चांकामुळे नागरिकांनी सरकारी धोरणांविषयी नाराजी व्यक्त केली आहे.
सामान्यांच्या आवाक्यात इंधनाचे दर आणण्यासाठी नियोजन करणे ही सरकारची जबाबदारी आहे. सरकारने ती गांभीर्याने पार पाडावी.