उरण : माथेरान येथे आई-वडिलांसोबत फिरायला आलेली नऊ वर्षीय सरीना घोड्यावरून पडल्याने गंभीर जखमी झाली. तिला मुंबई येथील रुग्णालयात दाखल करण्यात आले आहे.
शुक्रवारी मुंबई येथील २० जणांचा एक ग्रुप माथेरान येथे तीन दिवसांच्या सहलीसाठी आला होते. यामध्ये हसन रेडीवाला हे त्यांच्या कुटुंबीयांसोबत आले होते. शनिवारी सकाळी हसन रेडीवाला हे त्यांची पत्नी आणि नऊ वर्षीय मुलगी सरीना यांच्यासोबत घोडेस्वारी करण्यासाठी निघाले. याचवेळेस, अलेक्झांडर पॉइंटनजीक आले असता सरीनाचा घोडा बिथरला आणि ती घोड्यावरून खाली पडली. यावेळेस, सरीनाचा पाय घोड्याच्या रिकीबीत अडकल्याने बिथरलेल्या घोड्याने तिला काही अंतरापर्यंत ओढत नेले. यामुळे, सरीना हिच्या डोक्याला गंभीर दुखापत झाली. तिच्यावर प्राथमिक उपचार करून तिला तातडीने मुंबई येथील रुग्णालयात दाखल करण्यात आले आहे. दरम्यान, आजच्या या घटनेमुळे पुन्हा एकदा पर्यटकांच्या सुरक्षिततेचा प्रश्न निर्माण झाला आहे. गेल्या दोन वर्षांपूर्वी अशाच प्रकारे झालेल्या अपघातात एक महिला आणि इंग्लड येथील एका चिमुरडीचा मृत्यू झाल्याची आठवण ताजी झाली.