बिग बॉसच्या घरातील पहिला कर्णधार विनीत भोंडेचा कार्यकाळ संपल्यानंतर कर्णधारपद कोणाकडे जाणार याची उत्सुकता घरातील इतर सदस्यांसोबतच प्रेक्षकांना देखील होती. प्रेक्षकांमध्ये अनेक नावांची चर्चा होती. काल अखेर या चर्चेला पूर्णविराम मिळाला. विनीतचा कार्यकाळ संपल्यानं बिग बॉसच्या घरातील नवा कर्णधार म्हणून आस्ताद काळेची निवड करण्यात आली आहे.
बिग बॉसनं घरामधील कर्णधारपदाचं महत्त्व घरच्यांना समजावलं आणि नव्या कर्णधाराच्या निवडणुकीची घोषणा केली. यानंतर स्मिता गोंदकर आणि आस्ताद काळे यांच्यात कर्णधार पदासाठी रितसर मतदान घेण्यात आलं. आश्वासनं, प्रचार या गोष्टींमुळं बिग बॉसच्या घरात निवडणुकीचा फड रंगला होता.
मतदान झाल्यानंतर निकाल आस्ताद काळेच्या बाजूनं लागल्यानंतर त्याच्या गटातील सदस्यांनी एकच जल्लोष केला. आता हा नवीन कर्णधार बिग बॉसच्या घरात नक्की काय खेळी खेळणार हे पाहणं रंजक ठरणार आहे