मास्टर ब्लास्टर सचिन तेंडुलकर, प्रसिद्ध उद्योजिका अनु आगा आणि अभिनेत्री रेखा यांचा राज्यसभेचा कार्यकाळ एप्रिलमध्ये संपत आहे. त्यामुळे या तीन जागांवर वर्णी लागावी म्हणून उद्योगजगत आणि बॉलिवूडमध्ये स्पर्धा सुरू झाली आहे. रेखा यांच्या रिक्त होणाऱ्या जागेवर बॉलिवूडचा खिलाडी अक्षय कुमारचे नाव आघाडीवर आहे. त्याशिवाय अभिनेत्री जुही चावला, गजेंद्र चौहान, अनुपम खेर, सलीम खान, सुरेश ओबेरॉय, विवेक ओबेरॉय आणि ऋषी कपूर यांचीही नावं राज्यसभेच्या या एका जागेसाठी चर्चेत असल्याचं सूत्रांनी सांगितलं.
कला, संस्कृती, साहित्य आणि सामाजिक क्षेत्रात भरीव योगदान देणाऱ्यांची राष्ट्रपतींद्वारे राज्यसभेवर नियुक्ती केली जाते. या क्षेत्रात योगदान देणाऱ्या १२ जणांचा राज्यसभेचा कार्यकाळ येत्या एप्रिलमध्ये संपुष्टात येत आहे. त्यात अनु आगा, सचिन तेंडुलकर आणि रेखा यांचा समावेश आहे. अभिनेत्री रेखा यांच्या रिक्त होणाऱ्या जागेवर कला क्षेत्रातून अक्षय कुमारची राज्यसभेवर वर्णी लागण्याची दाट शक्यता आहे. शहिदांसाठी निधी उभारण्याचं काम असो, सॅनिटरी नॅपकीनबाबतची जागृती मोहीम असो, वा पंतप्रधानांनी आयोजित केलेलं स्वच्छता अभियान असो प्रत्येक कार्यात अक्षय कुमार आघाडीवर होता. त्यामुळे त्याची या जागेसाठी वर्णी लागण्याची दाट शक्यता आहे.
तर राष्ट्रीय स्वयंसेवक संघाशी जवळीक असलेले अभिनेते गजेंद्र चौहानही या स्पर्धेतील महत्वाचे दावेदार असल्याचं मानलं जातंय. पुण्यातील फिल्म इन्स्टिट्यूटच्या अध्यक्षपदावरून पायउतार व्हावं लागल्याने चौहान यांना भाजपकडून राज्यसभेची बक्षिसी दिली जाऊ शकते, असा कयास वर्तविण्यात येत आहे. दरम्यान, अक्षय कुमार आणि गजेंद्र चौहान यांच्यासह अभिनेता जॅकी श्रॉफ, वहिदा रहमान, आशा पारेख आणि मधूर भांडारकर यांची नावंही या एका जागेसाठी चर्चेत असल्याचं सूत्रांनी सांगितलं.