उन्हाळ्याच्या झळा वाढू लागल्यामुळे फ्रिजची खरेदी करून त्याचा वापर सुरू केल्यानंतर अवघ्या सहा महिन्यांमध्ये नव्या फ्रिजची कूलिंग करण्याची प्रक्रियाच बंद झाल्यामुळे एका महिलेला मनस्ताप सहन करावा लागला. विशेष म्हणजे हा फ्रिज दुरुस्तीला दिल्यानंतरही त्याचे दुरुस्ती करून देण्याचे पैसे घेऊनही फ्रिज नादुरूस्त अवस्थेमध्ये दिल्याप्रकरणी ठाणे ग्राहक मंचाने सॅमसंग कंपनीचा विक्रेता, सॅमसंगचे ठाणे शाखा प्रबंधक, क्षेत्रिय प्रबंधक आणि मुख्य प्रबंधक यांच्याविरोधात तक्रार केली. या तक्रारीची दखल घेऊन या प्रकरणामध्ये मंचाने तक्रारदार महिला रेशमा चौबे यांच्या बाजूने निकाल दिला आहे. पुढील दोन महिन्यांमध्ये हे पैसे परत करण्याचे आदेश ठाणे ग्राहक मंचाकडून देण्यात आले आहेत. मंचाच्या सदस्या माधुरी विश्वरूपे यांनी हा निकाल दिला आहे.
डोंबिवलीतील राजूनगर परिसरात राहणाऱ्या रेशमा चौबे यांनी १४ एप्रिल २०१० रोजी ११ हजार ७०० रुपयांचा फ्रिज खरेदी केला, परंतु तो फ्रिज सहा महिन्यांत बंद झाला. त्यामुळे त्यांनी या फ्रिजचे विक्रेते असलेल्या अंबिका डिस्ट्रिब्युटर्सकडे हा फ्रिज दुरुस्तीसाठी पाठवला. त्यासाठी १ हजार ७०० रुपयांचे शुल्कही घेण्यात आले. परंतु दुरुस्ती झाली नसल्याने फ्रिज बदलून मागितल्यानंतरही त्यांनी तो दिला नाही. त्यामुळे अखेर २० डिसेंबर रोजी या कंपनीला रेशमा यांनी पत्र पाठवले परंतु त्याचीही दखल घेण्यात आली नाही. त्यामुळे अखेर त्यांनी सगळ्यांविरोधात ग्राहक मंचाकडे तक्रार दाखल केली. या प्रकरणी प्रतिवादी असलेल्यांपैकी सॅमसंगच्या वतीने लेखी माहिती देण्यात आली असून या फ्रिजची किंमत ९२०० असल्याचे त्यांनी स्पष्ट केले. तसेच या फ्रिजचे कूलिंग क्वॉइल नीट हाताळले गेले नसल्याने खराब झाल्याचे त्यांनी स्पष्ट केले. तसेच, फ्रिजमधील बर्फ चाकूने काढल्याने ही क्वॉइल खराब झाली असून ही दुरूस्ती वॉरण्टीमध्ये नसल्याचेही त्यांनी स्पष्ट केले. परंतु नवीन क्वॉईल आणि दुरुस्तीसाठी १ हजार ७०० रुपये घेतल्याचे त्यांनी मान्य केले. या दोन्ही बाजूंचा विचार करून ग्राहक मंचाने संबंधित कंपनीला फटकारले. कंपनीकडून क्वॉईल दुरुस्त केल्याचे दिसत असले तरी कूलिंग प्रॉब्लेम असल्याचे स्पष्ट झाले आहे. तसेच, ग्राहकाने चाकूने बर्फ काढल्याचा कोणताच पुरावा संबंधित कंपनीने दिला नसल्यामुळे त्यांचे म्हणणे मंचाने अमान्य केले आणि दोषपूर्ण सेवा दिल्याचे तसेच चुकीच्या व्यापारप्रथेचा वापर केल्याची घोषणा केली.
या प्रकरणी ग्राहक मंचाने फ्रिज निर्माता कंपनीला फटकारले असून फ्रिज खरेदी केल्यापासून दर साल दर शेकडा या सहा टक्के दराने फ्रिजची किंमत आणि रक्कम परत करण्याचे आदेश दिले आहेत. तसेच हा फ्रिज परत देण्याचीही सूचना तक्रारदार महिलेला केली आहे. तसेच, दुरुस्ती रक्कमही व्याजासह परत करण्याचे तसेच न्यायिक खर्चापोटी तीन हजार रुपये परत करण्याचे आदेश ठाणे ग्राहक मंचाकडून देण्यात आले आहेत.