मासिक पाळी काळात महिला खेळाडूंना अनेक समस्यांना सामोरे जावे लागते. जिल्हा क्रीडा अधिकारी रवींद्र नाईक यांच्या पुढाकाराने आणि विविध संस्थांच्या सहभागातून राज्यात आदर्श ठरावे, असे कार्य घडत आहे. मुंबई-आग्रा हायवेवरील विभागीय क्रीडा संकुलात सॅनिटरी नॅपकिन व्हेंडिंग मशिन बसवले जात असून, राज्यातील हा पहिलाच उपक्रम आहे. या उपक्रमाचे उद्घाटन आज, सोमवारी होणार आहे.
महाराष्ट्र टाइम्सने ‘वाट स्वच्छ आरोग्याची’ हा उपक्रम हाती घेतला असून, त्या अंर्तगत या विषयावर विविध क्षेत्रात जनजागृती केली जात आहे. त्याच पार्श्वभूमीवर खेळाडूंना मासिक पाळीच्या कालावधीत येणाऱ्या अडचणी, ‘अडचणींचा सामना’ या फोकसमध्ये मांडण्यात आल्या होत्या. या समस्या नाशिकचे जिल्हा क्रीडा अधिकारी रवींद्र नाईक यांच्या निर्दशनास आल्यानंतर आपणही या उपक्रमात सहभागी होऊन महिलांच्या अडचणी सोडवाव्यात, असा त्यांनी निर्धार केला. या उपक्रमासाठी सरकारी पातळीवर कोणत्याही स्वरुपाची आर्थिक तरतूद नसताना त्यांनी लोकसहभागातून हे मशिन विभागीय क्रीडा संकुलात बसवले आहे. या सॅनिटरी नॅपकिन व्हेंडिंग मशिनचे उद्घाटन आज (सोमवार) विभागीय आयुक्त राजाराम माने यांच्या हस्ते होणार आहे. याचवेळी विभागीय आयुक्त कार्यालयाने आयोजित केलेल्या ‘चला खेळूया’ या क्रीडा स्पर्धेचे उद्घाटनदेखील करण्यात येणार आहे.
शिवाजी स्टेडियममध्येही लवकरच सुविधा
हा उपक्रम सर्व जिल्ह्यात टप्प्याटप्प्याने राबविण्यात येणार असून, विभागीय क्रीडा संकुलानंतर दुसऱ्या टप्प्यात हे मशिन छत्रपती शिवाजी स्टेडियम येथे बसविण्यात येणार आहे. या मशिनसाठी नाशिक जिल्हा फुटबॉल असोसिएशनने आर्थिक सहकार्य केले आहे. या ठिकाणी अनेक महिला खेळाडू सरावासाठी येत असतात. त्यांना हे फायद्याचे ठरणार आहे.
अनेक महिला खेळाडूंना स्पर्धेच्यावेळी मासिक पाळी आली, तर त्याबाबत वाच्यता होत नव्हती. परंतु, त्याबाबत आता चांगली जनजागृती झाली आहे. महिला खेळाडू बोलू लागल्या आहेत. महिलांच्या सामन्यावेळी सॅनिटरी नॅपकिनची व्यवस्था करण्यात येईल. त्यासाठीच हे मशिन उपलब्ध होत आहे.
– रवींद्र नाईक, जिल्हा क्रीडा अधिकारी, नाशिक