रेल्वे स्थानकावर हरवलेला चार तोळ्यांचा सोन्याचा हार प्रामाणिकपणे परत करणारा व्यक्ती कोणालाही भगवानच वाटेल. असाच अनुभव रविवारी एका महिला प्रवाशाला रेल्वे स्थानकावर आला. भगवान इंगोले असे तो हार परत करणारया लोहमार्ग पोलिसाचे, तर परमित कौर गुरप्रीत सिंग (३०, रा. पंजाबी लाईन, कामठी रोड) असे महिला प्रवाशाचे नाव आहे.
दोन दिवसांपूर्वीच लग्न झाल्याने ही महिला कुटुंबीयांसबोत पाहुण्यांना सोडायला रेल्वे स्थानकावर आली होती. धावपळीत गळ्यातील हार स्थानक परिसरात पडला मात्र त्याकडे लक्ष नसल्याने ते प्लॅटफॉर्मवर निघून गेले. दरम्यान लोहमार्गचे भगवान इंगोले यांना हा पडलेला हर दिसला. त्याचवेळी एक रिक्षा चालकही तो हार उचलण्यासाठी आला मात्र आधीच इंगोले यांनी तो हार अपल्या ताब्यात घेतला व आपले सहकारी दिलीप भदोरिया तसेच हेड कॉन्स्टेबल प्रमोद घ्यारे यांना सांगितले. तिकडे परमित नातेवाईकांना सोडून घरी जाण्यासाठी निघाली असता गळ्यातील सोन्याचा हार दिसत नसल्याने ती घाबरली. त्यामुळे ती लोहमार्ग पोलिस ठाण्यात तक्रार द्यायला आली. पोलिस उपनिरीक्षक सुशील पांडे यांनी हेड कॉन्स्टेबल रवींद्र सावजी आणि योगेश घुरडे यांना हा हार शोधण्यास सागितले. त्याचवेळी इंगोले यांना हार सापडल्याची माहिती त्यांना मिळाली. इंगोले यांना सापडलेला हार परमित कौर यांचाच असल्याचे स्पष्ट झाले. त्यामुळे मग ठाण्यात त्यांना हा हार देण्यात आला. भगवान इंगोले आणि सर्वच लोहमार्ग पोलिसांचे त्यांनी आभार मानले.