नगर शहरातील तारकपूरमधील प्रकाशपूर येथे दागिने पॉलिश करून देण्याच्या बहाण्याने दोन चोरट्यांनी २५ हजार रुपये किमतीचे मंगळसूत्र चोरून नेले. याप्रकरणी तोफखाना पोलिस स्टेशनला दोन अज्ञात व्यक्तींविरोधात फसवणुकीचा गुन्हा नोंदविला आहे.
बुधवारी दुपारी सुंदर प्रेमचंद ठोंबरे यांच्या घरात दोन व्यक्ती आल्या. सोन्याचे दागिने पॉलिश करून देतो, असे दोघांनी सांगितल्यानंतर ठोंबरे यांनी घरातील मंगळसूत्र पॉलिश करण्यासाठी दोघांकडे दिले. त्यांनी घरातील गॅसवर भांड्यात पाणी गरम करायला ठोंबरे यांना सांगितले. गरम पाण्याच्या भांड्यात हळद टाकून मंगळसूत्र टाकले, असे दाखवून चोरटे हे निघून गेले. त्यानंतर ठोंबरे यांनी भांड्यात मंगळसूत्र शोधले. परंतु, मंगळसूत्र सापडले नाही. घरात आलेल्या दोन चोरट्यांनी मंगळसूत्र चोरून नेल्याचे ठोंबरे यांच्या लक्षात आल्यानंतर त्यांनी तोफखाना पोलिस स्टेशनला फिर्याद नोंदविली आहे.